Ўзбекистон президенти Коррупцияга қарши курашиш агентлиги Энергетика вазирлиги, манфаатдор вазирлик ва идоралар билан биргаликда 2023 йил 1 сентябрга қадар ёқилғи-энергетика соҳасини “коррупциясиз соҳа”га айлантириш бўйича норматив-ҳуқуқий ҳужжат лойиҳасини ишлаб чиқиш ва белгиланган тартибда Президент Администрациясига киритиш вазифасини топширди. Бу ҳақда давлат раҳбарининг 24 майдаги фармонида сўз боради.
Бош прокуратура ҳузуридаги Мажбурий ижро бюроси истеъмол қилинган энергия ресурслари учун қарздорликни ундириш тўғрисидаги ижро ҳужжатларининг мажбурий ижро этилишини таъминлаш мақсадида тизимдаги ҳар бир ходимининг масъулиятини ошириш чораларини кўради.
Давлат хавфсизлик хизмати, Ички ишлар вазирлиги ва Бош прокуратура ҳузуридаги Иқтисодий жиноятларга қарши курашиш департаменти электр, газ узатиш ва тақсимлаш тармоқларига ноқонуний уланиш, ёқилғи-энергия ресурслари талон-торож қилинишининг олдини олиш бўйича тезкор-қидирув тадбирларини ўтказиш чораларини кучайтиради.
Бош прокуратура ҳузуридаги Иқтисодий жиноятларга қарши курашиш департаменти “Ўзэнергоинспекция” билан ҳамкорликда қайта тикланувчи энергия манбалари қурилмалари ҳамда энергия самарадор ва энергия тежайдиган замонавий технологияларни жорий қилиш мақсадида ажратилган бюджет тизими бюджетлари ва давлат мақсадли жамғармалари маблағларининг, шунингдек, Ўзбекистон кафолати остида жалб этиладиган чет эл кредитларининг мақсадли сарфланишини ўрганиб боради.
Фармон билан 2023 йил 1 сентябрдан:
- аҳоли томонидан Энергетика вазирлигининг интернетдаги махсус ахборот тизимига юборилган электр, иссиқлик энергияси, газдан фойдаланиш қоидаларини бузиш билан боғлиқ ҳуқуқбузарликлар ҳақидаги фотосурат ва видеоёзувлар белгиланган тартибда кўриб чиқилади;
- ҳуқуқбузарликлар тўғрисидаги фотосуратлар ва видеоёзувларни юборган шахслар пул мукофоти билан рағбатлантирилади;
- ҳуқуқбузарлик тўғрисидаги фотосуратлар ва (ёки) видеоёзувлардаги ҳуқуқбузарларнинг шахсини аниқлаш Энергетика вазирлигининг ҳудудий органлари сўровига асосан ички ишлар органлари томонидан амалга оширилади.
Изоҳ (0)