Global Risk Report ҳисоботида Марказий Осиё учун 2025 йилдаги асосий хавфлар санаб ўтилди. Минтақа давлатлари яқин икки йилда қатор жиддий таҳдидларга дуч келиши кутилмоқда.
Экспертларнинг тахминига кўра, геосиёсий беқарорлик асосий хавфлардан бири бўлиб қолмоқда. Бунга қуролли тўқнашувлар (давлатлараро, ички, прокси-урушлар), эҳтимолий давлат тўнтаришлари ва халқаро муносабатларнинг кескинлашуви киради.
Шунингдек, ҳисоботда ресурс тақчиллигига алоҳида эътибор қаратилган. Айниқса, Қирғизистон ва Ўзбекистонда бу сув ҳамда энергия ресурслари тақчиллиги билан кучаймоқда.
Global Risk Report 2025 да қайд этилишича, экологик муаммолар ҳавонинг, сувнинг ва тупроқнинг ифлосланишида, шунингдек, аҳоли сони ва саноатнинг ўсиши туфайли атроф-муҳитга тушадиган юкламанинг ортишида намоён бўлмоқда. Иқтисодий хавфлар қаторига инфлация, нархларнинг ошиши, иқтисодий инқироз, турғунлик ва давлат қарзининг кўпайиши киради.
Таҳлилчиларнинг фикрича, ижтимоий муаммолар қашшоқлик, тенгсизликнинг кучайиши, малакали кадрлар етишмаслиги ва “ақлли кадрлар чиқиб кетиши” билан боғлиқ.
Global Risk Report — бу глобал хавфлар тўғрисидаги ҳисоботдир. У Давосдаги Жаҳон иқтисодий форуми томонидан Цюрих ва Марш МакЛеннан билан ҳамкорликда ишлаб чиқилган.
Ҳисоботда глобал хавфларни идрок этиш (GRR) тадқиқоти натижалари келтирилган бўлиб, унда 1500 га яқин жаҳон экспертларининг фикрлари жамланган. У қарор қабул қилувчиларга жорий инқирозлар ва узоқ муддатли устуворликларни мувозанатлашда ёрдам бериш учун глобал хавфларни учта вақт оралиғида таҳлил қилади.
Изоҳ (0)