Prezidentning 10-fevraldagi farmoni bilan “O‘zenergoinspeksiya” xodimlariga tadbirkorlik obyektlarini kunning istalgan paytida tekshirish vakolati berildi.
Farmon bilan energiya resurslaridan noqonuniy foydalanish holatlariga qarshi kurashish sohasi takomillashtirilishi munosabati bilan prezidentning ayrim hujjatlariga o‘zgartirish va qo‘shimchalar kiritildi. Ushbu o‘zgarish va qo‘shimchalarda yoqilg‘i-energetika resurslarini behuda sarflash hamda ulardan noqonuniy va samarasiz foydalanish holatlarini aniqlash, sifatsiz yoqilg‘i mahsulotlari realizatsiyasiga chek qo‘yish borasida davlat nazoratini amalga oshirish mexanizmlarini soddalashtirish ko‘zda tutilgan.
Jumladan, prezidentning 2023-yil 24-maydagi “Yoqilg‘i-energiya resurslaridan foydalanish sohasida davlat nazorati samaradorligini oshirish chora-tadbirlari to‘g‘risida”gi farmoniga kiritilgan qo‘shimchaga ko‘ra, “O‘zenergoinspeksiya” tomonidan yoqilg‘i-energetika resurslarini qazib olish, ishlab chiqarish, qayta ishlash, tashish, saqlash, yetkazib berish (taqsimlash, sotish) va iste’mol qilish faoliyati bilan shug‘ullanadigan xo‘jalik yurituvchi subyektlarda ularning faoliyatini tartibga soluvchi qonunchilik hujjatlariga rioya etilishi bo‘yicha o‘tkaziladigan nazorat tadbirlari doirasida sutkaning istalgan vaqtida o‘tkaziladigan tekshiruvlar tekshiruv boshlangandan so‘ng 24 soat ichida “Yagona davlat nazorati” axborot tizimida ro‘yxatga olish orqali vakolatli organni xabardor etish tartibida amalga oshiriladi.
“Tadbirkorlar huquqlari va qonuniy manfaatlarini ishonchli himoya qilish chora-tadbirlari to‘g‘risida”gi prezident farmoniga kiritilgan o‘zgartirishga ko‘ra, “O‘zenergoinspeksiya” quyidagi masalalar bo‘yicha tezkor nazorat tadbirlarini o‘tkazadi:
- yoqilg‘i-eneriya resurslarini qazib olish, ishlab chiqarish, qayta ishlash, tashish, saqlash, yetkazib berish (taqsimlash, sotish) va iste’mol qilish faoliyati bilan shug‘ullanadigan xo‘jalik yurituvchi subyektlarda ushbu sohadagi talablarga rioya etish,
- yoqilg‘i-energiya resurslarini behuda sarflash, ulardan noqonuniy va samarasiz foydalanish hamda iste’molchilarga realizatsiya qilinayotgan yoqilg‘i-energiya resurslari sifatini (neft va gaz mahsulotlaridan namunalar olish, laboratoriyalarda tahlil qilish, miqdorini o‘lchash va tarqatish) nazorat qilish.
Farmonda qayd etilishicha, energiya resurslaridan noqonuniy foydalanish holatlariga qarshi kurashish sohasida samarali davlat nazoratini amalga oshirishga to‘qsinlik qilayotgan ayrim omillarni bartaraf etish maqsad qilingan.
O‘zbekistonda elektr energiyasi bo‘yicha tadbirkorlarga solinadigan jarimalar miqdori qayta ko‘rib chiqilishi rejalashtirilgan. Bu haqda prezidentning biznes uchun teng sharoit va adolatli raqobat muhitini ta’minlashga qaratilgan farmonidagi “Yo‘l xaritasi”da belgilandi.
“O‘zenergoinspeksiya” davlat rahbarining 2022-yil 21-dekabrdagi farmoniga muvofiq Energetika vazirligi huzurida tashkil etilgandi. 2024-yil avgustdan ushbu inspeksiya Vazirlar Mahkamasi bo‘ysunuviga o‘tkazildi.
Izoh (0)