Аргентинада кўзи ёриган хонанда Муниса Ризаева YouTubeъга берган интервьюсида мухлисларини қизиқтирган кўплаб саволларга жавоб берди.
— Фарзандли бўлганим учун Аллоҳимга фақат шукр айтаман. Чунки менда фарзанд кўриш билан боғлиқ жуда катта муаммо бўлган. Кичик ёшимдан бошлаб жуда кўп шифокорларга олиб боришган ва кўп марта муолажалар олганман. Лекин ЭКУсиз, кутилмаганда табиий йўл билан ҳомиладор бўлиб қолдим. Бу ҳаётда ҳар нарсанинг ўз вақт-соати бор экан.
Ижтимоий тармоқлар орқали жуда кўп санъат вакиллари, мухлислар табриклашди. Боламнинг исми билан боғлиқ тахминлар ҳам тарқалди. Кимдир Алан, Муҳаммад ёки Марат деётганлар ҳам бор. Аммо мен шу кунгача ҳеч кимга ўғлимнинг асл исмини айтганим йўқ. Бунинг сабаби аҳли илмлар билан маслаҳатлашганимизда, исмини сир тутишимизни ва ёмон кўзлардан асрашимизни тавсия қилишди. Болам ҳали жуда кичкина, ҳозир юзини кўрсатмаганимда ҳам қорни кўп ўғрийди, инжиқланади. Аслида болам жуда ювош, аммо у билан боғлиқ видеолар қўйсам, ўша куни ўзгариб қолади. Сал катта бўлсин, унинг юзини ҳам, исмини ҳам ошкор этаман. У туғилмасиданоқ машҳур бўлиб кетди.
Хонанда ҳомиладорлиги билан боғлиқ шов-шувлар тарқалгани ва гап-сўзлар уни чарчатгани ҳақида гапирди.
— Ҳомиладорлигимда жойлаган видеоларим учун оила аъзоларим койиб беришди. “Кимгадир исботлашнинг нима кераги бор?” дейишди. Мен шунчаки, ўғлим эртага улғайганда “онанг туғмаган” деган ёлғон маълумотни эшитишини хоҳламайман. Чунки у ҳам бир кун улғаяди, мактаб, коллежда ўқийди. Бу гап инсонга жуда оғир ботади ва руҳиятига ҳам қаттиқ таъсир қилади, деб ўйлайман. Мен тўғри қилдим, одамларга исботлаганимдан кейин гап-сўзлар ҳам тинди.
Баъзи инсонлар душманлик қилгиси келиб ёлғон гап-сўзларни тарқатишган. Мунисани гапиришса, уларнинг Instagram’даги фаоллиги ортади. Аммо бундай гап-сўзлар фақат мен ҳақимда тарқалмаган. Масалан, Райҳон ҳақида ҳам қанча гапиришди. Ҳозирги кунда Ситора Фармонованинг оила қурганини муҳокама қилишяпти. “Нега эрини кўрсатмади, иккинчи хотинмикан? Ёки турмушга чиқмадими?” деган гаплар қулоғингизга чалинган бўлса керак.
Хонанда нима учун Аргентинада фарзандини дунёга келтиргани ҳақида гапирди.
— Фарзандимизни Аргентинада дунёга келтиришимни турмуш ўртоғим хоҳлади. Унинг дўстларининг аёллари ва яқинлари шу ерда фарзандли бўлишган. “У ернинг об-ҳавоси зўр, яхши шифокор бор”, дегани учун рад этолмадим. Чунки менга турмуш ўртоғининг гапига қулоқ солиш ўргатилган. Англияда яшаган бўлишимга қарамасдан, барибир ўзбекона урф-одатларга амал қилганмиз. Ҳақиқатан қийналмасдан фарзандимни дунёга келтирдим. Тошкент жуда совуқ, Аргентина эса илиқ ҳавоси ва хушманзара жойлари билан машҳур. Фарзандим билан ҳар куни энагаси, мен ёки бувилари ташқарига чиқиб, сайр қиламиз.
Ўн беш йил шоу-бизнесда фаолият юритиб, анчагина толиққан эдим. Чунки мен ўз-ўзимга продюсерман, ҳар кунлик тўй хизматлари ҳам одамни чарчатади. Аргентинага келиб, миям дам оляпти, ҳеч нарсани ўйламаяпман. Instagram’имни жамоа юритади, менга бундай видео олиб беринг, дейишади, уларга жўнатаман.
Шароитлар қанчалик зўр бўлмасин, барибир инсон ўз ватанини соғинар экан. Рости, она юртимни жуда соғиндим. Насиб қилса, 1 март куни Тошкентга қайтамиз, дейди Муниса Ризаева.
Изоҳ (0)