Туркиянинг Измир шаҳридаги аэропортда олтин қуймаларини ноқонуний олиб ўтишга уринган 6 нафар ўзбекистонлик аёл ушланди. Бу ҳақда Туркиянинг IHA агентлиги хабар берди.
Контрабандага қарши кураш бошқармаси аёлларнинг олтин олиб киришга уриниши ҳақида олдиндан маълумотга эга бўлган. 2 октябрь куни аэропортдан чиқишда улар қўлга олинган. Шунингдек, уларни кутиб олишга машинада келган эркак ҳам ушланган.
Автомобиль ва аёлларни кўздан кечириш чоғида ҳар бири 110 граммлик 82 дона олтин қуймалари, 18 дона ўйин приставкалари (Playstation), шунингдек, 3 дона смартфон топилган.
Суд қарори билан қўшимча текширув ўтказилганида эса аёллар жинсий азосида 84 дона олтин қуймалари яширилгани аниқланган. Жарроҳлик йўли билан чиқариб олинган олтин қуймаларининг умумий оғирлиги 9,2 килограммни ташкил этган.
Улардан олиб қўйилган олтин қуймаларининг жами оғирлиги 18 килограмм 500 граммни ташкил этиб, қиймати 55 миллион турк лираси (ёки 1,5 миллион доллар)га баҳоланмоқда.
Қўлга олинганларнинг барчаси Измир суди томонидан ҳибсга олинган.
Изоҳ (0)