“Дарё” нашри 20 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Байден Киевга келди. Украина НАТОга аъзо эмас, аммо урушдан кейинги уруш учун ҳимоя кафолати бўладими?
АҚШ президенти Жо Байден Европага ташрифи доирасида Киевга келди ва Украина президенти Владимир Зеленский билан бирга Михайлив соборида кўришди.
“Украинская правда” нашрининг ёзишича, Байден соборга урушда ҳалок бўлган украиналик ҳарбий хизматчилар хотирасига ҳурмат бажо келтириш учун келган. Бу вақтда эса Киевда ҳаво ҳужумидан огоҳлантирувчи тревога янгради.
Кейинроқ Зеленский Байденнинг ташрифини расман тасдиқлади ва америкалик ҳамкасби билан тушган суратни эълон қилди.
Оқ уй Байден Зеленский билан музокаралар учун Киевга ташриф буюрганини маълум қилди. Америка раҳбарининг ўзи эса Украина янги 500 миллион долларлик ҳарбий ёрдам олишини, бу ҳақда эртага расман эълон қилинишини айтди.
Байденнинг Киевга ташрифи ҳақида олдиндан эълон қилинмаган. Оқ уйнинг аввалги хабарида Байден 20—22 февраль кунлари Польшага ташриф буюриб, у ерда мамлакат президенти Анжей Дуда билан учрашиши ҳақида айтилганди.
Эслатиб ўтамиз, мазкур вазиятда Польша президенти Анжей Дуда НАТО давлатларини Украинага урушдан кейинги хавфсизлик кафолатларини беришга чақирди.
Financial Times таъкидлаганидек, НАТО мамлакатлари Украинага бера оладиган кафолатлар бошқача тузилишда бўлиб, НАТОнинг етакчи кучларини, масалан, АҚШ, Буюк Британия ва Францияни келажакда Украинага ҳужум қилинган тақдирда ҳарбий ёрдам кўрсатишга мажбур қилади.
НАТОнинг собиқ бош котиби Андерс Фог Расмуссен бундай кафолатларни Исроил АҚШдан олган кафолатларга ўхшаш деб таърифлади.
Афғонистон ва Покистон чегарасида қуролли тўқнашувлар бошланди
Афғонистон ва Покистон чегарасидаги Torxам назорат-ўтказиш пунктида эрталаб “Толибон” жангчилари ва Покистон ҳарбийларининг қуролли тўқнашуви юз берди, деб хабар бермоқда ОАВ. Томонлар бир-бирини оғир ва енгил қуроллардан нишонга олган.
Daily News Нангарҳордаги маҳаллий манбаларга таяниб отишма ҳали ҳам давом этаётганини ёзди. Torxамдаги дўкон эгаси Шабир Аҳмаднинг айтишича, бугун (20 февраль) эрталабдан бери оғир ва енгил қуролларнинг ўқ овози эшитилмоқда. Кейинчалик буни тасдиқловчи видео тарқалди.
Яна бир манбага кўра, икки томон ўртасидаги қуролли тўқнашув “Толибон” жангчилари Покистон ҳарбий постларидан бирига яқинлашганидан кейин бошланган. Унинг айтишича, Torxам шаҳри жанглар хавфи туфайли ёпиб қўйилган, “Толибон” одамлардан вазият яхшиланмагунча Torxамга бормасликни сўраган.
Torxамдаги “Толибон” расмийлари ҳали можарони тасдиқламаган бўлса-да, ҳаракатнинг Torxамдаги комиссари Муҳаммад Сиддиқ кеча тунда Покистон ҳукумати йўловчилар ҳаракатини тўхтатгани учун Torxам дарвозалари ёпилганини айтди.
Torxам назорат-ўтказиш пункти Покистон билан муҳим савдо йўлларидан бири ҳисобланади, у ерда ҳар куни савдо товарларидан ташқари минглаб одамлар чегарадан ўтиб қайтади.
Бахмут шаҳри Россия ва Украина учун қандай аҳамиятга эга?
Бахмут шаҳри ҳозир фронтнинг энг қайноқ нуқтасидир. Россия томонида асосан “Вагнер” ёлланма аскарлари урушаётган шаҳар учун жанглар 2022 йил июль ойидан бери давом этмоқда.
Украина учун Донецк вилоятидаги Бахмут шаҳрини ҳимоя қилиш қанчалик муҳим бу одамларни йўқотишга арзийдими?
Италия матбуоти мана шу каби саволларига Владимир Зеленскийдан жавоб олди.
“Бу унчалик катта шаҳар эмас. Руслар томонидан вайрон қилинган Донбассдаги кўплаб бошқа шаҳарлар билан бир хил. Биз учун уни ҳимоя қилиш муҳим, лекин ҳар қандай йўқотиш эвазига эмас, ҳамманинг ўлими баҳосига эмас. Ҳозирча бу мантиқан тўғри экан, курашаверамиз. Биз қаршилик кўрсатмоқдамиз ва, шу билан бирга, навбатдаги қарши ҳужумга тайёргарлик кўряпмиз”, — дейди Украина президенти
Украина етакчисининг қайд этишича, Россия кучлари Бахмутни қўлга олиб, сўнг Краматорск ва Славянскка — “иложи бўлса, Донбасс чегараларигача ва Днепргача” ҳужумни давом эттирмоқчи.
Журналистлар, шунингдек, Зеленскийдан агар уруш давом этса, Украина оёқда туриб бера оладими ёки йўқлигини сўради. Бунга жавобан у Киев қисқа муддатли урушга ва ўзининг ғалабасига ҳозирлик кўраётганини айтди.
“Қанчалик тез бўлса, қурбонлар шунчалик кам бўлади. 2014 йилда можаро музлатилганди ва бу бизга фойда келтирмади. Минск келишувлари Путинга ўтган йилги кутилмаган ҳужумга тайёргарлик кўриш учун вақт берди, биз ортиқ тузоққа тушмаймиз. Бизнинг аскарларимиз ўз оилаларини, уйларини ҳимоя қилаётгани учун шижоатга тўлган”, — дея қўшимча қилди Украина президенти.
Ҳарбий таҳлилчиларнинг таъкидлашича, Россия учун Бахмутнинг қўлга олиниши кўпроқ рамзий ва сиёсий аҳамиятга эга, аммо стратегик нуқтаи назардан муҳим эмас.
Ўзбекистонда ноқонуний ишдан бўшатиш ҳолатлари билан қандай курашиш мумкин?
Ўзбекистонда 2022 йилда Меҳнат инспекцияси томонидан касаба уюшма аъзоларига қарийб 54 миллиард сўм зарар пуллари ундирилди. Бу ҳақда АОКАда ўтказилган брифингда маълум қилинди.
Хабарга кўра, Касаба уюшмалари федерацияси ҳаракатлари туфайли корхона, ташкилот ва муассасаларда тузилган жамоа шартномаларининг 106 мингга яқин, яъни 94,6 фоизига ходим билан меҳнат шартномасини иш берувчи томонидан бекор қилишдан аввал албатта касаба уюшма қўмитасининг розилигини олиш талаби киритилишига эришилган. Бунинг натижасида ходимларни ноқонуний ишдан бўшатиш ҳолатларига чек қўйилади.
Жамоа шартномаларига киритиш орқали иш вақти ва дам олиш вақтини тартибга солиш борасида аксарият корхона ва ташкилотларда меҳнаткашлар учун асосий узайтирилган ва қўшимча таътиллар ўрнатилган.
Бу дегани, ҳар йили Жамоа шартномалари орқали 3 миллионга яқин ходим асосий узайтирилган, 2 миллион 900 минг нафарга яқин ходим эса йиллик қўшимча таътиллардан фойдаланмоқда.
2022 йилда Касаба уюшмаларининг Меҳнат инспекцияси томонидан 77 ярим минг нафар уюшма аъзосининг қонуний ҳуқуқлари тикланиб, ходимлар фойдасига салкам 54 сўм зарар пуллари ундириб берилди.
Изоҳ (0)