Исроил бош вазири Бенямин Нетаньяху офиси 25 август куни Ливанга “Ҳизбуллоҳ”ни қуролсизлантиришда ёрдам беришга тайёр эканини билдирди. Бу ҳақда Al Arabiya хабар берди.
Ливан ҳукумати 2025 йил бошида АҚШнинг “Ҳизбуллоҳ” ва бошқа қуролли гуруҳларни қуролсизлантиришга қаратилган режасини қўллаб-қувватлаш ҳақида қарор қабул қилган эди. Бу қарор мамлакатда кескин мунозараларга сабаб бўлган. Нетаньяху офисига кўра, агар Ливан армияси мазкур режани амалга ошира бошласа, Исроил Байрутга қарши ҳарбий ҳаракатларни камайтириш каби масалаларни кўриб чиқиши мумкин.
АҚШ элчиси Том Баррак томонидан тақдим этилган мазкур қуролсизлантириш режаси “Ҳизбуллоҳ”нинг ҳарбий салоҳиятини чеклаш борасидаги энг батафсил таклиф ҳисобланади. Гуруҳ ўз қуролларидан воз кечишга доимий равишда қаршилик кўрсатиб келган, хусусан, 2024 йил охирида Исроил билан бўлган урушдан кейин, бу можаро Ливан ҳудудининг бир қисмини вайрон қилган эди.
АҚШ воситачилигида Ливан ва Исроил ўртасида 2024 йил ноябрь ойида тузилган оташкесим келишуви натижасида юқоридаги можаро якунланган, унда Ливандан мамлакат бўйлаб барча “рухсатсиз” қуролларни мусодара қилиш талаб қилинган. Шунингдек, Исроил Ливандаги ҳужум операцияларини тўхтатишини билдирган. Шунга қарамай, Исроил бугунги кунга қадар Ливан билан чегарадаги 5 та ҳудудда қўшинларини ушлаб турибди ва “Ҳизбуллоҳ”га зарбалар беришда давом этмоқда.
Изоҳ (0)