“Уч ойлик бола истеъмол қиладиган озуқанинг ҳам муддати ўтиб кетган”. Эркинжон Турдимов оғриқли масалани муҳокама қилди 

Самарқанд вилояти ҳокими Эркинжон Турдимов вилоятдаги озиқ-овқат савдо дўконларида муддати ўтиб кетган маҳсулотлар ҳам сотилаётганини айтиб, “дўконларимизда виждонини сотган сотувчилар ҳам, мулкдорлар ҳам йўқ эмас экан”, деди. 

Вилоят ҳокимлиги ахборот хизматининг маълумот беришича, Эркинжон Турдимов мазкур масала юзасидан видеоселектор йиғилиши ўтказган. 

Жаҳлим чиққани, уч ойлик бола истеъмол қиладиган “Малютка”ларнинг ҳам муддати 6 ойлаб ўтиб кетган. Сотувчи буни билса-да, халқимизни алдаб сотаётганини кечириб бўлмайди, — дейди видеоселектор йиғилишида бу ҳақда гапирган ҳоким. 

Таъкидланишича, мазкур ҳолатни ўрганиш мақсадида вилоят ҳокимлиги томонидан ишчи гуруҳ ташкил этилган.

Ишчи гуруҳ Самарқанд шаҳри, Самарқанд ва Булунғур туманидаги савдо объектларида бўлди, видеорепортаж тайёрланди. Кўп жойларда яроқлилик муддати ўтиб кетган ёки ишлаб чиқариш муддати кўрсатилмаган колбаса, пишлоқ маҳсулотлари сотилаётганини учратишингиз мумкин, — дейилади вилоят ҳокимлиги ахборот хизмати тарқатган видеохабарда. 

Ишчи гуруҳ тўрт кунлик ўрганиши давомида Самарқанд шаҳри, Самарқанд ва Булунғур туманларидаги 41 та савдо шохобчасини ўрганган. Ушбу савдо дўконларида 1736 дона яроқлилик муддати ўтган маҳсулотлар борлиги аниқланди. 

Ҳурматли дўкондорлар, дўконнинг эгасимисиз? Озиқ-овқат сотяпсизми? Ноинсофлик қилманг, муддати ўтган маҳсулотларни сотманг. Йиғиштириб олиб кетинг. Бўлмаса, биз сизни йиғиштириб олишга мажбур бўламиз, — деди вилоят раҳбари Эркинжон Турдимов. 

Ишчи гуруҳ вакилининг билдиришича, савдо дўконларида қалбаки маҳсулотлар ҳам сотилаётгани аниқланган. 

Мен бутун самарқандликларга мурожаат қилмоқчиман, Самарқанд вилояти аҳолиси, нимаики сотиб оладиган бўлсангиз, “сроги”га қаранг. Илтимос қилиб сўрайман. Чунки дўконларимизда виждонини ютган сотувчилар ҳам, мулкдорлар ҳам йўқ эмас экан. Айримлар муддати бир кун ўтиб кетганини билмай қолиши мумкин, лекин ойлаб муддати ўтиб кетган маҳсулотлар ҳам сотиляпти. Бир ойлик муддати қолган бўлса ҳам олманг, барибир бу бирор куни ўзининг салбий таъсирини кўрсатади. Эртага фарзандингизнинг соғлиғи учун топган маблағингизни сарфлаб, “аптекама-аптека” югурасиз, — деди вилоят ҳокими.