Республикачилар партиясидан давлат раҳбари лавозимига номзодини қўймоқчи бўлган АҚШнинг 45-президенти Дональд Трамп жаҳон сиёсатчилари билан муносабатлари ҳақида гапирди.
Fox News’га берган интервьюсида у “ҳатто характери қийин одамлар билан” ҳам тил топишганини таъкидлади. Шунингдек, Трамп ядровий қуролга эга одамлар билан тил топишиш муҳимлигини алоҳида таъкидлади.
Fox News журналисти Дональд Трампни Демократик партиядан номзод бўлган АҚШнинг амалдаги президенти Жо Байденнинг истиқболларини баҳолашга таклиф қилди. Бунга жавобан Трамп турли сиёсатчилар билан алоқани сақлаб қолишга муваффақ бўлган кам сонлилардан бири эканлигини айтди.
Мисол учун, АҚШ собиқ президентининг сўзларига кўра, Венгрия бош вазири Виктор Орбан каби “ақлли, зўр, жуда ҳурматли, аммо мураккаб характерга эга инсон” ҳам Дональд Трампнинг давлат раҳбари лавозимига қайтишини қўллаб-қувватлаган.
“У оддий нарсани айтди: ҳамма Трампдан қўрқарди, лекин ҳамма уни ҳурмат қилди. Ва бу ҳақиқат. Мен президент бўлганимда, Путин ҳеч қачон Украинага ҳужум қилмаган бўларди, мен Путин билан яхши тил топишаман. Биласизми, Путин ва унга ўхшаш одамлар билан тил топишиш яхши”, деди Трамп ва Хитой раҳбари Си Цзиньпин билан ҳам яхши муносабатларга эга эканлигини таъкидлади.
Изоҳ (0)