“Вир ва Зара”, “Бажранги оға” ҳамда ҳинд актёрларининг ҳашаматли уйларида суратга олинган бошқа фильмлар (фото)

Болливуд юлдузларининг уйи, айниқса, Шохруҳ Хон, Салмон Хон ва Саиф Али Хонларнинг уйлари архитектураси, ўзига хослиги билан яхши маълум. Санъат вакилларининг уйлари режиссёрлар эътиборидан ҳам четда қолмайди ва айрим фильмларда юлдузларнинг истиқомат қиладиган уйларини ҳам кўриш мумкин бўлади.

Шоҳруҳ Хоннинг “Маннат” вилласи “Мухлис” фильмида (2016 йил)

Мазкур фильм актёр Арян Кҳаннанинг ашаддий мухлиси ҳақида ҳикоя қилади. Фильмдаги баъзи саҳналарда, масалан, омма тўпланган кадрда “Маннат”ни кўриш мумкин.

Фильмда уй олдида тўпланган одамлар эса Шохруҳ Хоннинг мухлислари ва улар фильмда суратга тушгани учун пул тўланмаган. Болливуд юлдузининг мухлислари севимли кумирини узоқдан бўлса ҳам кўриш учун тез-тез унинг уйи олдида тўпланиб туради.

Амитабҳ Баччанга қарашли “Пратикша”, “Бомбей суҳбатлари” фильмида (2013 йил)

“Пратикша”, Амитабҳ Баччанга қарашли Мумбайдаги бешта уйдан бири ҳисобланади. Тhe Times Of India маълумотларига қараганда, мазкур уй актёр харид қилган энг биринчи кўчмас мулк ҳисобланади.

Унда Амитабҳ, отаси Ҳариванш Рай Баччан ва онаси Тежи Баччан билан бирга яшаган. Айни вақтда актёр “Пратикша” жойлашган ҳудуддаги Жалсада яшашига қарамай, у ва оиласининг бошқа аъзолари Пратикшага тез-тез бориб туради. “Бомбей суҳбатлари” фильмининг Анураг Кашяп томонидан суратга олинган қисмида “Пратикша”ни қисман кўриш мумкин.

Каран Жоҳарнинг уйи “Бомбей суҳбатлари” фильмида

Мазкур фильмнинг биринчи қисми Каран Жоҳар томонидан суратга олинган ва унда режиссёрнинг ҳашаматли пентхаусини кўриш мумкин.

Фильмда Жоҳарнинг уйи Рани Мукержи ва Рандип Ҳуданинг уйи сифатида кўрсатилган.

Саиф Али Хоннинг Патаудадаги саройи “Вир ва Зара” фильмида (2004 йил)

Ҳинд киносаноатининг энг яхши фильмларидан бири бўлган “Вир ва Зара” да куйланган Main Yahaan Hoon қўшиғи суратга олинган саҳнада Саиф Али Хоннинг уйини кўриш мумкин.

Актёрнинг 150 та хонани ўз ичига оладиган уйига сарой, деб тариф берса ҳам бўлади. Унда еттита гардероб, еттита ётоқхона ва яна шунча билярд хонаси бор.

Салмон Хоннинг фермаси “Бажранги оға” фильмида (2015 йил)

Актёрнинг Панвелдаги фермаси — Арпита Фармс Болливуддаги энг машҳур жойлардан бири саналади.

Мазкур фермани 2015 йилда суратга олинган “Бажранги оға” фильмида кўриш мумкин.