Норвегия футбол клублари мамлакатнинг икки олий дивизионида видеоёрдамчи ҳакамлар (VAR) тизимини бекор қилиш ниятида. Бу ҳақда Норвегия футбол мухлислар бирлашмаси сайти хабар бермоқда.
Хабарга кўра, ҳозиргача 32 клубдан 18 таси VAR’ни бекор қилиш тарафдори, улардан 13 таси олий дивизион вакиллари ҳисобланади.
“Овоз бериш жараёни шуни кўрсатмоқдаки, Норвегиянинг энг кучли 32 клуби орасида кўпчилик VARга мутлақ қарши. Ушбу масалани муҳокама қилишни режалаштирган яна бир нечта клублар бор, бунга қарши чиқадиганлар сони бундан ҳам кўпроқ бўлиши мумкин”, дея бирлашма раиси Андерс Кжеллеволднинг сўзларини келтиради Тhe i нашри.
Якуний овоз бериш 22 январь куни бўлиб ўтиши кутилмоқда. Ҳисоботда клублар VAR сифати, унинг ўйин суръатига таъсири, тизим мавжуд бўлишига қарамай, мунозарали ҳакамлик қарорлари ва стадионларда камералар сони кўпайса, клублар зиммасига тушадиган молиявий юкдан норози экани аниқланган.
Изоҳ (0)