Эрон ядровий амбицияларини мустаҳкамлаш мақсадида Россия билан махфий музокаралар ўтказмоқда — Тhе Times

Эрон президенти Масъуд Пезешкиён россиялик ҳамкасби Владимир Путин билан кенг қамровли стратегик шериклик тўғрисидаги шартномани имзолаш учун яқин кунларда Москвага боради.

Маълум бўлишича, ушбу учрашув арафасида Эрон олий раҳбарининг маслаҳатчиси Россияга яширин ташрифлар билан бир неча бор борган, у ядровий дастурни амалга оширишда ёрдам сўраган бўлиши мумкин.

Эрон олий раҳнамоси Оятуллоҳ Али Хоманаийнинг катта маслаҳатчиси Али Ларижоний Россияга бир неча бор юқори мартабали амалдорлар билан учрашиш мақсадида учиб келган, у ядро дастурини амалга ошириш ва ҳаво ҳужумидан мудофаа тизимини мустаҳкамлашда ёрдам олишга ҳаракат қилган, деб ёзади Тhе Times.

Ғарб разведкаси вакилининг Тhе Times’га маълум қилишича, “уларнинг стратегик муносабатлари чуқурлашгани ва Россия Эрон ракеталари ҳамда дронларига қарам бўлгани сабабли Москва Эрон ядровий дастурига нисбатан илгари ўрнатилган қизил чизиқларни кесиб ўтишга тайёрлигидан хавотирлар мавжуд”.

Кремль матбуот хизмати Пезешкиён жорий йилнинг 17 январь куни расмий ташриф билан Россияга келишини хабар берди.

Икки томонлама ҳамкорликни янада кенгайтириш истиқболлари, шу жумладан савдо-инвестиция, транспорт-логистика ва гуманитар соҳаларда, шунингдек, минтақавий ва халқаро кун тартибининг долзарб масалалари муҳокама қилиниши кутилмоқда. Музокаралар якунида Путин ва Пезешкиён Россия ва Эрон ўртасида кенг қамровли стратегик шериклик тўғрисидаги шартномани имзолайди.

Эронга бомбани яратишда ёрдам керак бўлмаса-да, у “Россия билан яширин ҳамкорликдан, шубҳасиз, манфаатдор,” деб ҳисоблайди ядро қуролини тарқатмаслик бўйича НАТОнинг собиқ директори Уилям Алберг.

МАГАТЭнинг баҳолашича, агар Эрон уранни атом бомбасидан фойдаланиш учун зарур даражада бойитишга киришса, у бир неча кун ёки ҳафта ичида керакли миқдордаги материалга эга бўлиши мумкин. Албергга кўра, етказиб бериш воситалари билан боғлиқ муаммолар кўпроқ. Қуролнинг қолган қисмини тайёрлаш ва уни мос келадиган ракетага, масалан, баллистик ракетага жойлаштириш учун бир неча ойдан бир йилгача вақт кетиши мумкин.

Бундан ташқари, Ғарб разведка манбаларининг маълум қилишича, Эрон ўз ҳарбий-ҳаво кучларининг жанговар имкониятларини кенгайтириш учун Су-35 қирувчи самолётининг энг сўнгги версиясини сотиб олишга интилмоқда; ҳатто бундай самолётлар аллақачон харид қилингани тўғрисида хабарлар ҳам бор.

Теҳрон, шунингдек, ўтган йили Исроил томонидан зарбалар пайтида йўқ қилинган ҳаво ҳужумидан мудофаа тизимларини тиклаш ниятида.