Украинадан 2021 йилдан бери эвакуация қилинган юзлаб ҳиндистонлик МBBС талабалари Ўзбекистондаги етакчи тиббиёт университетида ўқишларини давом эттирмоқда. Бу ҳақда Times оf India хабар берди.
Қайд этилишича, Ҳиндистоннинг Украинадаги элчихонаси талабалар бошқа жойга кўчиб ўтишлари мумкин ёки йўқлигини сўраб мурожаат қилганидан сўнг, Самарқанд давлат тиббиёт университети 1000 дан ортиқ ҳиндистонлик тиббиёт талабаларини қабул қилган.
Биҳар штатининг Бегусарай шаҳридан бўлган Амит исмли талаба Россия ҳужум қилган вақтда Украинада ўқиётган бўлган ва у бир тунни ертўлада ўтказган. Кейинроқ эса у Ҳиндистон ҳукумати томонидан “Ганга операцияси” ташаббуси доирасида эвакуация қилинган.
“Мен ўлиб ёки Украинада қолиб кетаман деб ўйладим. Ҳиндистонга қайтганимдан сўнг мен ва оилам енгил тортди, лекин кейин нима бўлиши ҳақида ҳеч қачон тугамайдиган ноаниқлик даври бошланди. Мен Украинада уч йиллик МBBС курсини тугатган эдим ва ҳаммасини бошидан бошлаш ёки бошқа соҳадан кетиш вариант менга тўғри келмас эди. Кейинроқ Ўзбекистонга кўчиб ўтишга қарор қилдим”, — дейди Амит.
Унинг айтишича, Самарқандда яшаш нархи Украинаникидан қимматроқ, лекин у ўқишни давом эттириш имкониятидан хурсанд.
Самарқанд давлат тиббиёт университети проректори, доктор Зафар Аминовнинг сўзларига кўра, уруш бошланганда Ҳиндистон элчихонаси уларга мурожаат қилиб, жабрланган талабалар бошқа жойга кўчиб ўтишга рухсат олишлари мумкинлиги ҳақида сўраган.
“Биз ушбу талабаларни баҳоладик ва охир-оқибат уларни бир семестр қайта ўқитишга қарор қилдик. Кейин биз трансферларни осонлаштириш учун жамоа туздик ва бу талабалар учун махсус тадбирларни амалга оширдик. Шунингдек, мулоқот жараёнида муаммолар бўлмаслиги учун яна 30 нафар ҳиндистонлик ўқитувчини ёлладик”, — дейди у.
Аминовнинг айтишича, университет Украинадан келган 1000 дан ортиқ ҳиндистонлик талабани қабул қилган.
Изоҳ (0)