Zarafshonda tuproq tarkibidan tilla qumini kovlab olayotgan 4 kishi qum ostida qolib halok bo‘ldi

Ijtimoiy tarmoqlarda Navoiy viloyati Zarafshon tumanida oltin qazish niyatida bo‘lgan 40–50 kishini qum bosib qolgani to‘g‘risida xabarlar tarqalgandi. Favqulodda vaziyatlar vazirligi holat yuzasidan o‘rganish olib borishi haqida ma’lum qilgandi.

FVVning qayd etishicha, dastlabki surishtiruv ishlari olib borilgan va 40–50 kishining qum bosib qolganligiga oid ma’lumot o‘z isbotini topmagan.

Aslida 2021-yil 13-noyabr kuni soat 22:00 larda Konimex tumani “Karakata” OFY hududida joylashgan Lolazor nomli cho‘l hududida bir guruh fuqaro tuproq tarkibidan tilla qumlarini kovlab olish bilan shug‘ullangan va kutilmaganda qum ostida qolgan. Oqibatda 4 nafar fuqaro hayotdan ko‘z yumgan.

Bosh prokuraturaning ma’lum qilishicha, holat yuzasidan tuman prokuraturasi tomonidan tergovga qadar tekshirish harakatlari olib borilmoqda.

Bundan avval Buxoroda suv quvurlari yotqizilayotgan joyda yer o‘pirilishi sabab ikki kishi vafot etgani yuzasidan jinoyat ishi qo‘zg‘atilgani hamda Sirdaryodagi daladan FVV tuman bo‘limi ishchisining jasadi topilgani haqida xabar berilgandi.