Ўзбекистонда қимматбаҳо металл ва тошларни ноқонуний қазиб олганлик учун жавобгарлик кучайтирилиши кутилмоқда.
31 май куни депутатлар Ерни ва ерости бойликларини асраб қолишга ҳамда муҳофаза қилишга қаратилган қаратилган қонун лойиҳасини кўриб чиқиб, учинчи ўқишда қабул қилди.
Мазкур қонун лойиҳаси билан Жиноят кодекси, Жиноят-процессуал ҳамда Маъмурий жавобгарлик тўғрисидаги кодексларга қимматбаҳо металлар ва қимматбаҳо тошларни ноқонуний қазиб олинишига чек қўйиш, мазкур тоифадаги қилмишлар учун жавобгарликни кучайтиришни назарда тутувчи ўзгартириш ва қўшимчалар киритиш таклиф этилмоқда.
Республика ҳудудида фойдали қазилмаларни рухсатномасиз, шунингдек олтин қазувчилар усулида қазиб олинишига чек қўйиш ва ушбу ҳаракатлар учун жавобгарликни кучайтириш мақсадида Жиноят кодекси янги 196-1 ва 196-2-моддалари билан тўлдирилмоқда.
Бунга кўра, фойдали қазилмаларни рухсатсиз қазиб олиш учун маъмурий жавобгарликка тортилганидан сўнг бир йил ичида такроран содир этиш жиноий қилмиш деб баҳоланиши, фойдали қазилмаларни олтин изловчилар усулида рухсатсиз қазиб олиш учун тўғридан тўғри жиноий жавобгарлик белгиланмоқда.
Шунингдек, мазкур янги нормалардан келиб чиққан ҳолда ушбу жиноятларнинг дастлабки тергов ва суриштирув органлари томонидан тергов қилиш ваколати ички ишлар органлари тергов бўлинмаларига берилмоқда.
Депутатларнинг таъкидлашича, қонун лойиҳасининг қабул қилиниши ер ва ер ости бойликларини асраб-авайлаш ва муҳофаза қилиш билан боғлиқ қонунчиликнинг ижро этилишини таъминлашга, шунингдек ушбу соҳалардаги ҳуқуқбузарликларнинг самарали профилактикасига хизмат қилади.
Изоҳ (0)