Навоий вилоятида қўлбола усулда тайёрланган портловчи моддаларнинг муомалага киритилишининг олди олинди, деб хабар беради Бош прокуратура ҳузуридаги департамент.
Маълум қилинишича, департамент ҳамда ДХХнинг Навоий вилояти бошқармалари томонидан ИИБ ходимлари билан ҳамкорликда тезкор тадбир ўтказилган. Тадбирда Ш.А. исмли шахс фуқаро К.Ҳ.га олтин конларида ноқонуний равишда олтин заррачалари мавжуд қумларни қазиб олишда портлатиш ва олтин қазиб олиш ишларига “шерик” сифатида қўшиш эвазига, портловчи моддалардан қўлбола усулда тайёрланган 14 дона қурилмани берган вақтида ашёвий далиллар билан ушланган.
Мазкур ҳолат юзасидан Жиноят кодексининг 248-моддаси (ўқотар қуролнинг, ўқ-дориларнинг, ўқотар қурол асосий моддаларнинг, портлаш воситаларининг ёки портлаш қурилмаларининг қонунга хилоф муомаласи) билан жиноят иши қўзғатилиб, терговга тегишлилиги бўйича юборилган.
Бир неча кун олдин ДХХ олтин қазиб олиш учун шароит яратиб бериш эвазига фуқародан 30 минг доллар талаб қилган Навоий вилояти Томди тумани ички ишлар бўлими профилактика инспекторини қўлга олганди. Ундан олдин Самарқандда ноқонуний равишда олтин қазиб олиш билан шуғулланган яна бир гуруҳ кишилар ушланган эди.
Изоҳ (0)