22 февраль куни Навоий вилоятида фойдали қазилмаларни қазиб олиш фаолияти билан лицензиясиз шуғулланиб келган шахслар қўлга олинди. Бу ҳақда вилоят ИИБ ахборот хизмати «Дарё»га маълум қилди.
Маълум қилинишича, вилоят ИИБ ЖҚБ УЖҚКБ, Зарафшон шаҳар ИИБ, Миллий гвардия ва ФВБ ходимлари билан ҳамкорликда ўтказилган тезкор тадбир давомида Навоий вилоятининг Хатирчи, Навбаҳор, Самарқанд вилоятининг Нарпай ва Пахтачи туманларидан, Бухоро вилоятининг Шофиркон ва Вобкент туманларидан бўлган 7 та гуруҳ таркибида 54 нафар фуқаро олтин қазиб олиш билан ноқонуний шуғуллангани аниқланган.
Ушбу фуқаролардан 4 дона «движок», 7 дона «перфоратор», 2 та Ford русумли транспорт воситаси, 2 тонна оғирликдаги таркибида олтин зарралари бўлган тош-қумлар, шунингдек, қумларни солишга мўлжаллаган қоплар, арқонлар, электр кабеллари, дизель ва бензин ёнилғилари, кетмон ва белкураклар, қўлбола усулда тайёрланган тош майдалувчи қурилмалар тегишли тартибда холислар иштирокида ҳужжатлаштирилиб олинган.
Терговга қадар текширув ҳаракатлари давомида 54 нафар фуқаронинг шахсларига аниқлик киритилиб, тушунтириш хатлари ҳамда бармоқ изларидан наъмуналар олинган. Далилий ашё сифатида олинган 2 тонна руда қумлари таркибида қанча миқдорда олтин борлигини аниқлаш мақсадида НКМКга тегишли лабараторияга топширилган.
Навоий вилояти ИИБ ахборот хизмати раҳбари Ўктам Усмоновнинг маълум қилишича, Конимех тумани марказидан қарийб 200—220 километрча олис бўлган чўл ҳудудида «Караката» овули бор. Ушбу овулнинг «Лолазор» массивини, яъни эски тилло кони маҳаллий тилда «одам қадами етмас овлоқ ерлар» дейилади. Бухоронинг Ғиждувон, Шофиркон, Вобкент, Навоийнинг Конимех, Навбаҳор, Самарқанднинг Нарпай ва Пахтачи туманларининг кўплаб чекка ҳудуд аҳолиси бу овлоқ ерларни гўёки ўзлаштириб олган.
«Одамлар ‘Каракати’ овулига олиб борадиган манзилга томон ўзбошимчалик билан ўндан ортиқ йўллар очишган. Турли хилдаги юк ташиш машиналари, ҳатто, эшакаравалар изларидан пайдо бўлган бу йўллар орқали Навоий тоғ-металлургия комбинатидан чиқариб ташланадиган қумларни ташиб келишган. Бу қонунбузарликларнинг олдини олиш учун доимий қўшимча куч ажратилмаган, постлар ташкил қилинмаган», — дейди Ўктам Усмонов.
Матбуот котибининг сўзига кўра, тилло кукуни ўғирлашнинг ва унинг ортидан содир этилаётган жиноятларнинг олдини олиш учун тизимда қўшимча штатлар яратилиши, кучлар мустаҳкамланиши керак.
Аввалроқ Навоийда олтинни ноқонуний ковлаб олишга уринган 5 кишини тупроқ босиб қолгани, уларнинг жасади чуқурликда қарийб 2 ҳафта қолиб кетгани тўғрисида хабар берилганди.
Изоҳ (0)