“Толибон” афғон конлари бўйича 6,5 млрд долларлик шартнома имзолади. Ким нимани қазиб олади?

“Толибон” Кон-руда ва нефть вазирлиги умумий қиймати 6,5 миллиард доллардан ортиқ бўлган еттита конни қазиш бўйича келишувларни имзолади.

Кон-руда ва нефть вазири вазифасини бажарувчи Шаҳабуддин Делавер журналистларга берган интервьюсида айтишича, тоғ-кон шартномаларида тўлиқ шаффофлик мавжуд, ноқонуний қазиш ва контрабанданинг олди олинган, деб хабар бермоқда ТОLOnews.

Тоҳар вилоятидаги олтин конини China-Afghanistan Company ва Zarawar Afghanistan Privatе қабул қилиб олади, улар лойиҳага 310 миллион доллар сармоя киритади.

Лувгар вилоятидаги Мес Айнак конини эса Тuria хусусий компанияси қазийди ва лойиҳага 411 миллион доллар сармоя киритади.

Аfghan Invest ва Туркиянинг Epcol компаниялари Ғор вилоятининг Тулак туманида қўрғошин қазиб олиш бўйича шартнома имзолади. Ушбу компаниялар конга 537 миллион доллар сармоя киритиши кутилмоқда.

Ҳирот вилоятидаги Гҳорян темир кони участкаларидан бири Watan Darаkhshan’га топширилди, у 2,8 миллиард доллар сармоя киритмоқчи.

Саheel Middle East Мining & Logistics Company корхонаси Афғонистоннинг Darа-e-Noor ва Туркиянинг Epcol компаниялари билан ҳамкорликда Гҳорян конининг иккинчи участкасини қазиш бўйича шартномани қўлга киритди. Инвестициялар 874 миллион долларни ташкил этади.

Темир конининг учинчи участкаси Афғонистоннинг Шамс компанияси ва Британиянинг GBМ ва АD Resources компанияларига берилди, улар лойиҳага 572 миллион доллар сармоя киритади.

Bakhtar Steel Company ва унинг эронлик ҳамкорлари Аhya Sepahan ва Forsian коннинг тўртинчи участкасини қазиш бўйича шартнома олди. Улар лойиҳага 1,17 миллиард доллар сармоя киритиш ниятида.

Афғонистондаги фойдали қазилмаларнинг умумий қиймати 1 триллион долларга баҳоланмоқда.