Ayrim mahalliy davlat hokimiyati organlari hujjatlari E-qaror elektron tizimidan o‘chirib yuborilgani va yo‘qolib qolgani yuzasidan Adliya vazirligi ma’lumot berdi.
Ta’kidlanishicha, hukumat qaroriga asosan 2021-yil 1-iyuldan boshlab E-qaror elektron tizimi orqali ishlab chiqilgan hokim qarorlari avtomatik tarzda raqam berilib, tizimda e’lon qilib borilmoqda (xizmat doirasida foydalanish uchun mo‘ljallangan hujjatlar bundan mustasno).
Shu kungacha hokim qarorlarining 100 ga yaqin namunalari tizimga joylashtirildi, avtomatik statistik tahlil qilish va barcha jarayonlarni adliya organlari tomonidan monitoring qilib borish imkoniyati yaratildi. Tizim yo‘lga qo‘yilishi natijasida:
- butun respublika miqyosida hokimlik qarorlarini ishlab chiqish, qabul qilish va e’lon qilish elektron tarzda bir manzildan turib amalga oshirilmoqda;
- tizimdan 24/7 rejimida va Internet tarmog‘i mavjud bo‘lgan dunyoning istagan nuqtasidan foydalanish imkoniyati mavjud;
- sohaga zamonaviy axborot-kommunikatsiya texnologiyalari joriy etilishi natijasida hokimlik qarorlari soxtalashtirilishi oldi olindi;
- hozirga qadar 255 mingdan ortiq hokim qarorlari birorta qog‘oz ishlatilmasdan elektron tarzda qabul qilindi, natijada 1,2 mln dona yoki 6 tonna qog‘oz tejaldi;
- hokim qarorlarini ishlab chiqish va tegishli tashkilotlar bilan kelishishga ketadigan vaqt sezilarli darajada qisqardi (-25—30 foiz);
- qaror loyihalarini hokimga imzolash uchun yuridik xizmatni chetlab o‘tgan holda kiritish imkoniyati bartaraf etildi;
- hokim qarorlari ustidan jamoatchilik nazorati o‘rnatildi (avval bunday imkoniyat bo‘lmagan).
Iqtisodchi Otabek Bakirov o‘zining Teleram kanalida “Shaxsiy ma’lumotlarni yashirish uchunmi, boshqa sabab bilanmi, E-qaror tizimida o‘zgartirish kiritish funksiyasi hokimiyatlar ixtiyorida umuman bo‘lmasligi kerak”, deya post qoldirgan edi.
O‘zini adliya tizimida ishlashini qayd etgan o‘quvchilardan biri qoldirgan xabarga ko‘ra, E-qaror tizimidan qarorlar o‘chirilmaydi, balki yashirib qo‘yiladi. Adliya vazirligi bazadan qarorlarning yo‘q bo‘lib qolayotgani masalasida rasmiy izoh bergani yo‘q.Aytilishicha, shaxsiy ma’lumotlarga oid ma’lumotlarni himoyalash uchun yashirib qo‘yish funksiyasi mavjud ekan. Lekin hokimiyatlar bu funksiyani o‘rinli qo‘llash o‘rniga, butun boshli qarorlarni o‘chirib qo‘yish uchun ishlatishmoqda.
Amalda hokimiyat qarorlarida shaxsiy ma’lumotlar bemalol oshkor qilinib yotipti. Mana bitta misol. Andijon viloyati kengashining VI-43-162-1-0-K/22 qarori. Fuqarolarniing nafaqat ismi-sharifi, yashaydigan manzillarigacha ochiq oshkor ko‘rsatilgan. Bunaqa misollarni yuzlab keltirish mumkin, — deb yozadi u.
Izoh (0)