Бухоро вилояти ҳокими Ботир Зарипов вилоятдаги қатор туман ҳокимларини қаттиқ огоҳлантирди. Ҳоким тегишли фармойиши “E-qaror.gov.uz” порталига жойлаштирилган.
Қайд этилишича, Бухоро шаҳар ҳокими Ж.Носиров, Когон шаҳар ҳокими Ҳ.Давлатов, Жондор тумани ҳокими С.Ҳикматов, Когон тумани ҳокими М.Эсанов, Пешку тумани ҳокими В.Қаҳҳоров, Олот тумани ҳокими Н.Неъматова, Шофиркон тумани ҳокими А.Файзуллоев ҳамда Қоракўл тумани ҳокими Х.Тохиров тадбиркорлар, аҳоли хонадонлари ва ижтимоий объектларда қуёш панеллар ўрнатиш бўйича белгиланган вазифаларнинг бажарилишини таъминлашда оқсоқликка йўл қўйган.
Ҳисоб палатасининг топшириқ хатида қайд этилган камчиликларга йўл қўйган Бухоро, Когон шаҳарлари ҳокимлари, шунингдек, Олот, Шофиркон, Қоракўл ва Пешку туманлари ҳокимлари қаттиқ огоҳлантирилди.
2023 йил 1 июлгача юқорида номлари қайд этиб ўтилган ҳокимлар томонидан белгиланган кўрсаткичлар ижроси таъминланмаган тақдирда уларга нисбатан интизомий чоралар қўлланилади.
Шунингдек, вилоят ҳокими ўринбосарлари Ж.Турсунов, Н.Ҳамдамов, Р.Асадов, А.Назаров ҳам президентнинг қайта тикланувчи энергия манбаларини ва энергия тежовчи технологияларни жорий этишни жадлаштиришга оид қарори ижросини ташкил этишда йўл қўйган камчиликлари учун огоҳлантирилди.
Изоҳ (0)