“Дарё”да “МИБдан 7 миллиардга яқин қарздорлиги бор Андижон тумани ҳокими Captiva-5 сотиб олди ва бу қарорни яшириб қўйди” сарлавҳали мақола эълон қилинганди. Унда Андижон тумани ҳокимлиги “қора-мат” рангли Captiva 5Т Premier автомобилини харид қилгани, бунга туман ҳокимининг 13 июндаги қарори асос қилиб олингани, ушбу қарор “Э-қарор” платформасида яшириб қўйилгани, шунингдек, ХДФУ (хизмат доирасида фойдаланиш учун) ёзувининг мавжудлиги қайд этилганди.
_page-0001.jpg)
Андижон вилояти адлия бошқармаси ушбу ҳолат юзасидан муносабат билдирди.
Аниқланишича, туман ҳокимлиги томонидан молия органи билан дастлаб келишилмаган таклиф лойиҳаси бўйича қарор қабул қилинишига йўл қўйилган.
“Мазкур қарор юзасидан қуйидагилар аниқланган:
- қарорга асоссиз равишда “ХДФУ” грифи белгиланган;
- қарор қонунчилик ҳужжатларига зид равишда “ёпиқ” тартибда қабул қилинган.
Бироқ Ўзбекистон Республикаси Бюджет кодекси ҳамда “Давлат ҳокимияти ва бошқаруви органлари фаолиятининг очиқлиги тўғрисида”ги қонунга кўра, бюджет маблағларини ажратиш тўғрисидаги маълумотлар очиқ ахборот сифатида белгиланган.
Шунга кўра, мазкур қарор юзасидан туман ҳокимлигига Андижон туман адлия бўлими томонидан 2024 йил 15 ноябрь куни қонун ҳужжатларининг бузилиши, уларнинг сабаблари ва бунга олиб келувчи шарт-шароитларни бартараф этиш тўғрисида 1-60/12-7/94-сон тақдимнома киритилди”, дейилади муносабатда.
Адлия вазирлиги ахборот хизмати масъулларининг маълум қилишича, тақдимномага асосан Андижон туман ҳокимининг қарорини бекор қилиш белгиланган.
Изоҳ (0)