Андижон шаҳар прокуратураси томонидан олиб борилаётган жиноят иши доирасида депутат ва шаҳар ҳокими Баҳром Ҳайдаровни терговга жалб қилиш мақсадида Андижон вилояти прокуратурасига тақдимнома киритилди, деб хабар беради «Gazeta.uz».
Дастлабки тергов ҳаракатлари давомида Баҳром Ҳайдаров ҳокимият ҳузуридаги Ер майдонларини ажратиш бўйича доимий ишловчи махсус комиссия аъзолари билан гуруҳда Ер кодексининг 17, 23, 62-моддалари, қолаверса, президент ва Вазирлар Маҳкамасининг қарор ҳамда фармойишларига зид равишда жисмоний ва юридик шахсларга аукцион орқали ўзининг ваколатидан қасддан фойдаланиб, ер майдонларини тўғридан-тўғри ажратилиши ҳақида мутасадди мансабдорларга кўрсатма бергани аниқланган.
Бундан ташқари, ҳоким аслида бекор қилинган ҳужжатларни асос қилиб кўрсатган ҳолда, комиссия далолатномалари ва ер ажратиш тўғрисидаги қарорларига соҳта маълумотлар ва ёзувлар киритиб, 2019—2020 йилларда ер майдонларини ажратиш тўғрисидаги қарор ва фармойишларни қабул қилган.
Тақдимномага мувофиқ, Баҳром Ҳайдаров жами 8 та ҳолатда 19 618 квадрат метр ерни ноқонуний ажратиш орқали жами 1 миллиард 779 миллион сўм минимал аукцион баҳоси қийматидаги пул маблағларини давлат бюджетига ундирилмай қолишига сабабчи бўлган ва давлат манфаатларига зарар етказган.
Шаҳар ҳокимининг ҳаракатларида Жиноят кодексининг 205-моддаси (ҳокимият ёки мансаб ваколатини суиистеъмол қилиш) 2-қисми «а» банди, 209-моддаси (мансаб сохтакорлиги) 2-қисми «а» банди ва 229-моддаси (ўзбошимчалик) 2-қисми «а» бандида назарда тутилган жиноятлар таркиби мавжудлиги қайд этилган. Шундан келиб чиқиб, унга нисбатан эҳтиёт чораларини қўллаб лозимгини кўрсатилган.
Нашрнинг Бош прокуратура матбуот хизмати раҳбари Ҳаёт Шамсутдиновга таяниб ёзишича, мазкур хат асосида 3 февраль куни Андижон вилояти прокуратураси томонидан Халқ депутатлари Андижон вилояти кенгашига тақдимнома киритилган.
«Халқ депутатлари вилоят, туман ва шаҳар кенгаши депутатининг мақоми тўғрисида»ги қонуннинг 12-моддасига кўра, депутатни дахлсизлик ҳуқуқидан маҳрум қилиш тўғрисидаги масала тегишинча вилоят, туман, шаҳар прокурорининг ёки юқори турувчи прокурорнинг тақдимномасига биноан халқ депутатлари кенгаши томонидан ўн кун ичида ҳал этилади.
«Kun.uz» нашрининг қайд этишича, орадан 19 кун ўтган бўлса-да, Халқ депутатлари Андижон вилоят кенгаши прокурор тақдимномасини кўриб чиқишга шошилмаяпти. Қолаверса, қонунда халқ депутатлари кенгашининг депутатни дахлсизлик ҳуқуқидан маҳрум қилишга розилик бериш масаласига доир қарори дарҳол тегишли прокурорга юборилиши ҳам белгиланган.
Маълумот учун, Баҳромжон Ҳайдаров 2019 йилнинг 26 августида Дилмурод Раҳматуллаев ўрнига шаҳар ҳокими вазифасини вақтинча бажарувчи этиб тайинланганди. Ўша йилнинг октябрида Андижон шаҳри ҳокими лавозимига тасдиқланди.
Таъкидлаш жоизки, айрим депутатлар шаҳар ҳокимини ерни ноқонуний эгаллаб олганликда айблаб чиққанди. Хусусан, «Gazeta.uz» 2021 йилнинг майида Халқ депутатлари Халқ депутатлари Андижон шаҳар кенгашининг собиқ депутати Шуҳрат Каримов 19-сонли мактабга қарашли спорт майдончаси ҳудудида кўп қаватли турар жой биносининг қурилишини бекор қилишга эришганини ёзганди.
Шуҳрат Каримов ҳоким Баҳром Ҳайдаровга сўров юбориб, президент қарори (3931-сонли) бузилаётганини маълум қилган. Мактаб маъмурияти ва ота-оналар мактабнинг ўқув корпуси 570 ўқувчига мўлжалланган бўлсада, у ерда 1300 бола ўқиётгани сабаб мактаб учун қўшимча бино қуришни сўраганди.
Шунингдек, у ҳокимнинг 2021 йил 10 апрелдаги — Элевада Ут Group компанияси томонидан беш қаватли уйни қуриш тўғрисидаги қарори ноқонуний эканини маълум қилган. Собиқ депутат президентнинг 4427-сонли қарорига кўра, қишлоқ хўжалиги учун мўлжалланмаган бўш ер участкалари «E-ijro auksion» орқали кимошдига қўйилмасдан, унинг талаблари бузилганини айтганди.
Шуҳрат Каримов, шунингдек, журналист Хуршид Далиевнинг Андижонда ноқонуний ер ажратиш ва ноқонуний қурилиш ишлари тўғрисидаги хабарлари сабаб Бош прокуратурага сўров юборган эди. Унинг сўзларига кўра, қонун бузилиш ҳолатлари шаҳар адлия бўлими томонидан ҳам тасдиқланган. У вилоят прокурорларининг мазкур масалалар бўйича ҳаракатсизлиги сабаб уларнинг малакасини шубҳа остига олган ва Андижон прокуратураси ходимларига жамоатчилик баҳосини беришни сўраган.
Охир-оқибат ўзи муассис бўлган компанияга қарши очилган жиноят иши доирасида депутат дахлсизлиги маҳрум қилинган, кейинроқ эса Каримовнинг ўзи ҳибсга олинганди. Коррупцияга қарши курашиш агентлиги ва жамоатчилик депутатни қўллаб-қувватлаб чиққанди.
Андижон шаҳар кенгаши депутати Жаҳонгир Жиянов ушбу ҳолатлар Шуҳрат Каримовнинг интервьюси «Депутат 40 дақиқада Андижон шаҳар ҳокимининг барча кирдикорларини фош қилди» сарлавҳаси билан ижтимоий тармоқларда жойлаштирилганидан сўнг юз берганини «Дарё»га маълум қилганди.
Изоҳ (0)