Toshkent shahar hokimliklari tomonidan joylashtirilgan hujjatlarning har ikkitasidan bittasi “shaxsga oid” degan vaj bilan yashirib qo‘ymoqda. Berkitilgan hujjatlarning aksariyati moliyaviy xarakterga ega.
“Daryo” o‘tgan yilning dekabr oyida poytaxt hokimliklari tomonidan “E-qaror” yagona elektron tizimiga joylashtirilgan hujjatlar bo‘yicha tahlilni o‘tkazdi.
-CoZ_X0ad.jpg)
Yilning so‘nggi oyida qancha hujjat joylashtirilgan
Toshkent shahri va tumanlari hokimliklari tomonidan 2024-yilning 1-dekabrdan 30-dekabr kuniga qadar “E-qaror” platformasi orqali jami 744 ta hujjat qabul qilingan. Shundan 31 tasi normativ tusdagi qarorlar. Hujjatlarning yarmidan ko‘pi turli vajlar bilan yashirib qo‘yilgan.
Qabul qilingan hujjatlarning 547 tasi hokim qarori (72 foiz) 197 tasi farmoyish (28 foiz) hisoblanadi. Shundan 469 tasi, ya’ni 63 foizi mazmunida shaxsga doir ma’lumotlar, vasiylik va homiylik yoki amaldagi qonunchilikka muvofiq boshqa turdagi foydalanishi cheklangan axborot mavjudligi vaji bilan yashirib qo‘yilgan.
Toshkent shahri hokimligi nechta hujjatni yashirgan
Dekabr oyi davomida Toshkent shahri hokimi Shavkat Umrzoqov tomonidan jami 118 hujjat, shundan 85 tasi qaror, 33 tasi farmoyish imzolangan. E’tiborlisi, hujjatlarning 82 tasi (70 foizi) mazmunida shaxsga doir ma’lumotlar, vasiylik va homiylik yoki amaldagi qonunchilikka muvofiq boshqa turdagi foydalanishi cheklangan axborot mavjudligi vaji bilan yashirib qo‘yilgan. Ommadan yashirilgan hujjatlarning 62 tasiga “Xizmat doirasida foydalanish uchun” belgisi qo‘yilgani esa juda qiziq.
Yashirishga usta huquqshunos hokimlar
“E-qaror” platformasida hujjatlarni yashirish bo‘yicha Chilonzor tumani hokimligi yetakchiligini bermagan. Dekabr oyida hokimlik tomonidan jami 66 hujjat, shundan 47 tasi qaror va 19 tasi farmoyish joylashtirilgan. Hujjatlarning 53 tasi, ya’ni 80 foizi yashirib qo‘yilgan.
2021-yildan buyon Yunusobod tumaniga hokimlik qilib kelayotgan Toshkent shahrining prokurori sobiq o‘rinbosari Bahodir Abduvaliyev esa yilning so‘nggi oyida imzolagan 52 ta hujjatining 37 tasini boshqalar ko‘rolmasligi uchun “berkitib” qo‘ygan.
“Kuchli uchlik”dan 65 foizlik “natija” bilan Olmazor tumani hokimligi joy olgan. Ushbu natijaga uzoq yillar ichki ishlar tizimida ishlab, hozirda tumanga rahbarlik qilayotgan Azizxon Umarxonov 69 ta hujjatdan 44 tasini berkitish orqali “erishgan”.
Mirobod (45 ta hujjatdan 28 tasi), Shayxontohur (43 ta hujjatdan 26), Yangi hayot (45 ta hujjatdan 27 tasi), Bektemir (47 ta hujjatdan 28 tasi), Yashnobod (27 ta hujjatdan 16 tasi) va Uchtepa (51 ta hujjatdan 30 tasi) tumanlari hokimlari tomonidan joylashtirilgan qaror va farmoyishlarning 60 foizining “yuziga qizil parda” tortib qo‘yilgan.
Qayd etish lozim, Yangi hayot tumani hokimligi joylashtirgan farmoyishlarning 93 foizini “yopiq” holda ko‘rish mumkin.
Mavzuga doir: Adliya vazirligi “E-qaror” tizimida ayrim hujjatlar yo‘qolib qolganiga munosabat bildirdi
Mirzo Ulug‘bek tumani hokimligi esa 58 ta hujjatning 32 tasini berkitib qo‘ygan. Bu jami hujjatning 55 foizini tashkil etadi.
Poytaxt hokimliklari orasida Sergeli tumani hokimligini boshqalarga nisbatan eng ochiq hokimlik deyish mumkin. Ushbu hokimlik tomonidan imzolangan 52 ta hujjatning teng yarmi berkitilgan. Bu boshqa hududlarga nisbatan olganda ancha yaxshi natija.
“XDFU” qo‘yish bo‘yicha “chempion”
Poytaxtning yagona ayol hokimi Nilufar Allabergenova boshqa hamkasblariga nisbatan biroz ochiq faoliyat yuritishini ko‘rsatgan. Biroq asli kasbi huquqshunos bo‘lgan hokim hujjatlarga “xizmat doirasida foydalanish uchun” belgisini qo‘yish bo‘yicha yetakchilik qilgan. Dekabr oyida u tomonidan 71 ta hujjat (63 ta qaror, 8 ta farmoyish) imzolangan. Qaror va farmoyishlarning 57 foizi yashirilgan, shundan 37 tasiga “XDFU” belgisi qo‘yilgan.
Berkitilayotgan hujjatlarning aksariyati moliyaviy xarakterga ega
Yashirilgan qaror va farmoyishlarning aksariyati moliyaviy xarakterga ega. Shu sababli ommadan yashirilayotgan bo‘lishi mumkin.
Masalan, Yunusobod tumani hokimining 2024-yil 24-dekabrdagi 309-14-206-Q/24– sonli qarori platformada berkitib qo‘yilgan.
Qarorda tuman mahalliy byudjetining 2024-yilda shakllangan qo‘shimcha manbalari hisobidan tuman hokimligi va tarkibiy bo‘limlari, tuman iqtisodiyot va moliya bo‘limi, g‘aznachilik xizmati bo‘limi rahbar va xodimlarini bir oylik lavozim ish haqi miqdorida mukofotlash belgilangan.
Hujjat mazmuni va ilovasida shaxsga doir ma’lumotlar mavjud emas. Bundan tashqari asossiz ravishda “XDFU” belgisi bosilgan.
Shu sababli ham tuman adliya bo‘limi tomonidan o‘tkazilgan monitoring davomida qaror ochib qo‘yilgan bo‘lishi mumkin.
Mavzuga doir: Qarorlarning har uchtadan bittasi yopiq holda. “E-qaror” platformasi nega bunday yo‘l tutmoqda?
“Yopiqlik” orqali qonunbuzilishlarga yo‘l qo‘yilmoqda
Hokimliklar hujjatlarni berkitish orqali nafaqat o‘z qilmishlarini jamoatchilikdan yashiryapti, balki shu orqali “Byudjet kodeksi”, “Normativ-huquqiy hujjatlar to‘g‘risida”, “Davlat hokimiyati va boshqaruvi organlari faoliyatining ochiqligi to‘g‘risida”gi va boshqa bir qator qonun hamda qonunosti hujjatlarning talablari buzilishiga yo‘l qo‘ymoqda.
Afsuski, bu kabi yashirilgan shubhali qaror va farmoyishlar boshqa hududlarda ham yo‘q emas.
“Daryo” “e-qaror” platformasiga joylashtirilgan hujjatlarning kuzatishda davom etadi.
Izoh (0)