Катта маблағни ўзлаштиришда айбланаётган Андижон шаҳри ҳокими ушлаб турилган пайтда қарорларга имзо чеккани ҳақида хабар берилган эди. Кейинроқ унинг номидан ҳокимлик девонхонаси мудири ҳужжатларни имзолагани маълум бўлганди. Андижон шаҳрининг янги ҳокими Ғофуржон Абдураҳмонов қарори билан собиқ ҳокимнинг қатор қарорлари бекор қилинди.
«E-qaror» электрон платформасида Баҳром Ҳайдаровнинг электрон имзоси орқали тасдиқланган 6 ва 7 июнь кунлари қабул қилинган қарор ва фармойишлар жойланганди. Бу вақтда ҳоким ушланиб, қамоққа олинган эди.
Андижон вилоят адлия бошқармасининг билдиришича, Андижон шаҳар ҳокими Баҳром Ҳайдаров 6 июнь куни соат 16:50 да жиноят иши юзасидан ушланган бўлиб, унга суд ажримига кўра 7 июнь куни қамоқда сақлаш эҳтиёт чорасини қўлланилган.
6 июнь куни соат 09:43 ва 21:18 оралиғида ҳамда 7 июнь куни 18:10 ва 21:07 оралиғида ҳокимлик девонхонаси мудири С. Қодиржонов томонидан ҳокимга тегишли электрон рақамли имзодан фойдаланилган ҳолда «E-qaror» платформасида 26 та қарор ва фармойиш имзоланган.
Ғофуржон Абдураҳмоновнинг 18 июндаги қарори билан собиқ ҳоким Баҳром Ҳайдаровнинг 2022 йил 21 апрель, 17 май, шунингдек, 6—7 июнь кунлари қабул қилган қарорлари бекор қилинган.
Изоҳ (0)