Андижон вилояти ҳокими Шуҳрат Абдураҳмонов президент Шавкат Мирзиёевнинг қарори ижросини таъминлаш мақсадида қарор қабул қилди. Қарорида вазирлар — Шерматов, Давлетов, Ишметов, Зокиров, Бобоевлар ҳамда Тошкент шаҳар ҳокими Ортиқхўжаевларга топшириқ берган.
Гап шундаки, президент Шавкат Мирзиёевнинг 2022 йил 27 июнь куни «Оммавий ахборот воситаларини қўллаб-қувватлаш ва журналистика соҳасини ривожлантириш чора-тадбирлари тўғрисида»ги қарори қабул қилинди.
Қарор билан Қорақалпоғистон Республикаси Вазирлар Кенгаши ва вилоятлар ҳокимликларига ҳар йили Ўзбекистон Журналистлар уюшмасининг тегишли ҳудудий бўлимлари фаолиятини самарали ташкил қилиш, сақлаш харажатларини қоплаш ва моддий-техника базасини мустаҳкамлаш учун маҳаллий бюджетнинг қўшимча манбалари ҳисобидан белгиланган тартибда субсидия сифатида маблағ ажратиб бориш чораларини кўриш белгиланган.
Бундан ташқари, маҳаллий ҳокимликлар раҳбарлари қарор билан тасдиқланган 2022—2023 йилларда Оммавий ахборот воситаларини қўллаб-қувватлаш ҳамда журналистика соҳасини янада ривожлантириш чора-тадбирлари дастурида белгиланган вазифаларнинг ўз вақтида ва сифатли бажарилиши учун шахсан масъул эканликлари кўрсатиб ўтилган.
Мазкур қарорда ўзига юклатилган вазифалар ижросини таъминлаш мақсадида барча вилоят ҳокимлари қаторида Андижон вилояти ҳокими Шуҳрат Абдураҳмонов ҳам 2022 йилнинг 8 июль куни «Ўзбекистон Республикаси президентининг 2022 йил 27 июндаги ПҚ-294-сонли қарори ҳақида»ги қарорини имзолаган.
Ушбу ҳужжатни кўздан кечирар эканмиз, унинг биринчи бандида президент қарори ижро учун қабул қилинганлиги қайд этилади. Иккинчи банд эса салкам олти саҳифадан иборатлиги ва президент қарорининг тўлиқ, бандма-банд нуқта, вергулига қадар кўчирилганлигини кўриш мумкин. Ваҳоланки, ушбу ва биринчи бандни битта қилиб «президентнинг ушбу қарори ҳамда мазкур ҳужжат билан тасдиқланган иловалар маълумот ва ижро учун қабул қилинсин» деган жумла билан тугаллаш мумкин эди. Бироқ қарор лойиҳасини ишлаб чиққан ва уни тасдиқлаган ҳокимлик юридик хизмати ҳужжатнинг айни ўзини кўчириб қўйишни лозим топган. Бунга вилоят раҳбари ҳам эътибор қилмай имзо қўйган.
Қарорнинг 4-бандида вилоят ҳокимининг тўрт нафар ўринбосарига дастурда белгиланган вазифаларнинг ўз вақтида ва сифатли бажарилиши учун шахсан масъул эканликлари кўрсатиб ўтилган. Аммо уларга айнан қандай вазифа юклатилганлиги аниқ-тиниқ қилиб белгилаб берилмаган. Қарорга илова қилинган дастурда эса ўринбосарларнинг номлари зикр этилмагани нима вазифалар юклатилганлигини сўроқ остига қўйиши шубҳасиз.
Ҳоким қароридаги 1- ва 2-иловалар президент қароридаги иловаларни айнан сўзма-сўз такрорлаган. Қизиқ жиҳати ушбу иловаларнинг қўшимча қилиниши бўйича қарорнинг бирор бандида айтилмаган. Балки, ушбу иловалар ҳокимлик масъулларининг ёки юристларининг тушунмаганлиги, адашганлигидан қарорга киритилгандир, деган гумондамиз.
Қарор билан тасдиқланмаган, аммо илова қилинган 3-иловадаги чора-тадбирлар дастурини кўздан кечирар эканмиз Дастур вилоятга мослаштириш ўрнига президент қарори билан тасдиқланган Дастурдан тўлиқ кўчириб ўтказилганлиги кўринади. Иловага мувофиқ Ахборот ва оммавий коммуникациялар агентлиги директори, вазирлик ва идораларга ҳамда бир қатор ташкилотларнинг юқори турувчи органлари раҳбарлари зиммасига вазифалар юклатилган. Шу орқали Шуҳрат Абдураҳмонов вилоятдаги тегишли ташкилотларга топшириқни юқори турувчи органлар орқали берган бўлиши мумкин, деган яхши гумондамиз. Материалларни тайёрлаш жараёнида бошқа вилоят ҳокимларининг айнан ушбу мавзудаги қарорлари билан танишиб чиққанимизда Самарқанд, Наманган, Жиззах вилояти ҳамда Тошкент шаҳри ҳокимлари дастурнинг ўзларига мослаштирганликларини кўриш мумкин.
Қўл учида қабул қилинган мазкур ҳужжат Шуҳрат Абдураҳмонов томонидан имзоланган биринчиси эмас. У шу кунга қадар бир нечта президент фармон ва қарорлари ижросини таъминлаш мақсадида қабул қилган қарорларда ҳам белгиланган норматив ҳужжатлар қандай бўлса, шундай тарзда кўчириб қўйилган ҳолатда қабул қилган.
Шулардан келиб чиқиб, бир нечта саволлар туғилади. Балки, ҳужжатлар ҳокимликдаги ишончли шахслар томонидан ҳокимга тегишли электрон рақамли имзодан фойдаланилган ҳолда имзоланаётгандир? Наҳотки Шуҳрат Абдураҳмонов ўзига тегишли бўлган қарор ва фармойишларни қабул қилиш олдидан кўриб чиқмаса?
Ҳудудий адлия органлари раҳбарлари лойиҳани белгиланган тартибда ҳуқуқий экспертизадан ўтказиш ва лойиҳа қонунчилик ҳужжатларига мувофиқ бўлса, унга хулоса бериши, агарда эътирозлар мавжуд бўлса, лойиҳани маҳаллий ижро этувчи ёки вакиллик органига қайтариши лозим. Бизнингча, ҳудудий адлия органлари ҳуқуқий экспертизадан ўтказиш ишларини бажармайди. Балки, бажарса-да хатоларни тўғрилаш учун қайтариш ўрнига ҳокимларнинг гапини икки қилгиси келмасдан, лойиҳаларга ижобий хулоса бериш орқали тинч яшашни зарур деб билишар ёки ҳудудларда етарли даражадаги малакага эга юристлар етишмас?
«E-qaror» электрон тизими орқали қабул қилиниб, эълон қилинган қарорларни ўрганиб чиқиш давомида маҳаллий ижро этувчи органлар раҳбарларининг ҳуқуқий саводхонлигини янада ошириш, адлия органлари масъулиятини икки карра ошириш зарурияти мавжудлигини яққол намоён бўлди.
«Дарё» вилоят, шаҳар ва туман ҳокимликлари томонидан қабул қилинган қарор ва фармойишларни таҳлил қилишда давом этади ва мавзуга яна қайтади.
Иброҳим Оҳунов
Изоҳ (0)