Andijonning barcha xalq deputatlari kengashlari jamoatchilik muhokamasiga qo‘yilmagan mahalliy byudjetni bir kunda tasdiqladi. Bu Byudjet kodeksi talablariga mutlaqo zid.
Normativ-huquqiy hujjatlar loyihalari muhokamasi portaliga qarorlar loyihalari 2024-yilning 27-dekabr kuni joylashtirilgan. Muhokama muddati 2025-yilning 11-yanvarigacha etib belgilangan bo‘lsa-da, ular bir kun ichida kelishilgan hamda huquqiy ekspertizadan o‘tkazilgan.
Bir kunda ishlab chiqilgan, huquqiy ekspertizadan o‘tkazilgan va qabul qilingan
27—28-dekabr kunlari Andijon viloyatidagi barcha shahar va tumanlarining xalq deputatlari kengashlari raislari hududlarning 2025-yilgi mahalliy byudjetini tasdiqlashga oid qarorlarini imzoladi.
Qarorlar O‘zbekiston Respublikasining 2024-yil 24-dekabrdagi “2025-yil uchun O‘zbekiston Respublikasining davlat byudjeti to‘g‘risida”gi qonuni hamda Xalq deputatlari Andijon viloyati kengashining 2024-yil 26-dekabrdagi VII-3-046-1-0-K/24—son qaroriga muvofiq qabul qilingan.
Ma’lumot uchun, kengash qarori 15-noyabrdan 30-noyabrgacha bo‘lgan muddatda umumxalq muhokamasidan o‘tkazilgan.
Byudjet kodeksi talablari qanday?
Kengashlarning ushbu normativ-huquqiy hujjat tusidagi qarorlari jamoatchilik muhokamasidan o‘tkazilmasdan qabul qilingan.
Vaholanki, Byudjet kodeksining 99-moddasi hamda Vazirlar Mahkamasining “Mahalliy davlat hokimiyati organlari faoliyatiga “E-qaror” elektron tizimini joriy etish chora-tadbirlari to‘g‘risida”gi qarori bilan tasdiqlangan nizomga asosan tuman va shahar hokimliklari 10-oktyabrdan kechiktirmay loyihalarni Normativ-huquqiy hujjatlar loyihalari muhokamasi portaliga jamoatchilik muhokamasi o‘tkazilishi uchun joylashtirishi lozim edi.
Shuningdek, Byudjet kodeksida qaror loyihalari jamoatchilik muhokamasi yakunlari bo‘yicha kelib tushgan asoslangan takliflar va fikr-mulohazalar asosida qayta ko‘rib chiqilib, 1-noyabrdan kechiktirmay tegishincha xalq deputatlari tumanlar va shaharlar kengashlariga kiritilishi belgilangan.
Adliya bo‘limlari huquqiy ekspertizadan o‘tkazgan
Bundan tashqari, nizomga asosan mahalliy davlat hokimiyati organining yuridik xizmati jamoatchilik muhokamasi yakunlangandan so‘ng loyiha bo‘yicha belgilangan tartibda xulosa tuzishi hamda loyihani huquqiy ekspertizadan o‘tkazish uchun hududiy adliya organlariga belgilangan tartibda tegishli hujjatlarni ilova qilgan holda kiritishi shartligi belgilangan.
Ana shundan so‘ng, adliya organlari huquqiy ekspertizadan o‘tkazib, loyiha qonunchilik hujjatlariga muvofiq bo‘lsa, xulosa berishi kerak. Agarda loyiha bo‘yicha taklif va e’tirozlar mavjud bo‘lganida, loyihani mahalliy davlat hokimiyati organining yuridik xizmatiga qaytarishi zarur.
Afsuski, hududlardagi adliya bo‘limlari boshliqlari jamoatchilik muhokamasidan o‘tkazilmagan qaror loyihalarini huquqiy ekspertizadan o‘tkazib, maqsadga muvofiqligi yuzasidan xulosa berishgan.
Bundan tashqari, qarorlarda ularning kuchga kirish muddati ko‘rsatilmagan.
Jamoatchilik muhokamasi o‘tkazilgach qarorlar qayta qabul qilinadimi?
O‘rganishlar davomida jamoatchilik muhokamasi portalida qarorlar loyihalari ular qabul qilinib bo‘lgandan so‘ng, o‘sha kunning o‘zida, ya’ni 2024-yilning 27-dekabr kuni joylashtirilgani ma’lum bo‘ldi. Muhokama muddati 2025-yilning 11-yanvarigacha etib belgilangan.
Skrinshot: regulation.gov.uz
Ammo qarorlar bir kun davomida ishlab chiqilgan, kelishilgan hamda huquqiy ekspertizadan o‘tkazilgan. Jamoatchilik muhokamasiga ham shu kunning o‘zida joylashtirilgan.
Bundan tashqari, qarorlar kengashlar raislari tomonidan sessiya o‘tkazilmasdan va deputatlar tomonidan tasdiqlanmasdan qabul qilingan.
Natijada shoshilinch qabul qilingan qarorlar orqali bir qancha qonunbuzilish holatlariga yo‘l qo‘yilgan.
Muhokamadan o‘tkazilmagan qarorlar qonunchilikka zid emasmi?
Jamoatchilik muhokamasi davomida qarorlar yuzasidan taklif va shikoyatlar tushsa qanday bartaraf etiladi? Qarorlar qayta qabul qilinadimi?
Qaror loyihasi nega avvalroq muhokamadan o‘tkazilmagan?
Tuman adliya bo‘limlari nega muhokamadan o‘tkazilmagan qarorlarni huquqiy ekspertizadan o‘tkazdi?
“Daryo” shu va mavzu doirasidagi boshqa savollarga Adliya vazirligidan javob kutib qoladi.
Izoh (0)