Катта маблағни ўзлаштиришда айбланаётган Андижон шаҳри ҳокими ушлаб турилган пайтда қарорларга имзо чеккани ҳақида хабар берилган эди. Андижон вилоят адлия бошқармасининг «Дарё»га маълум қилишича, ҳужжатларга унинг номидан ҳокимлик девонхонаси мудири имзо чеккан.
«E-qaror» электрон платформасида Баҳром Ҳайдаровнинг электрон имзоси орқали тасдиқланган 6 ва 7 июнь кунлари қабул қилинган қарор ва фармойишлар жойланган. Бу вақтда ҳоким ушланиб, қамоққа олинган эди.
Андижон вилоят адлия бошқармасининг билдиришича, Андижон шаҳар ҳокими Баҳром Ҳайдаров 6 июнь куни соат 16:50 да жиноят иши юзасидан ушланган бўлиб, унга суд ажримига кўра 7 июнь куни қамоқда сақлаш эҳтиёт чорасини қўлланилган.
6 июнь куни соат 09:43 ва 21:18 оралиғида ҳамда 7 июнь куни 18:10 ва 21:07 оралиғида ҳокимлик девонхонаси мудири С. Қодиржонов томонидан ҳокимга тегишли электрон рақамли имзодан фойдаланилган ҳолда «E-qaror» платформасида 26 та қарор ва фармойишлар имзоланган.
Ҳозирда ушбу қабул қилинган қарор ва фармойишларнинг қонунийлиг Андижон вилояти адлия бошқармаси томонидан жойига чиқиб ўрганилмоқда.
UZINFOCOM МЧЖ мутахассислари томонидан Андижон шаҳар ҳокимининг «E-qaror» электрон тизимидаги шахсий кабинети Адлия вазирлигининг кўрсатмасига асосан блокланди.
Ушбу жараёнда ҳужжатларни соҳталаштириш эҳтимоли борлигини инобатга олиб, тегишли материаллар прокуратура органларига юборилади. Ҳар бир қабул қилинган қарорнинг қонунийлиги ўрганиб бўлмагунча, уларни ижрога қаратиш мақсадга мувофиқ эмаслиги юзасидан тегишли ижрочи органларга хабарлар берилди.Ўрганиш якунларига кўра қўшимча маълумот тақдим этилади.
Изоҳ (0)