Тошкентдаги автобусларда 2025 йил 1 январдан бошлаб нақд пул қабул қилиш тўхтатилганди. Йўл ҳақини нақд пул кўринишида берган йўловчи жаримага тортилиши мумкин. Бу ҳақда Транспорт назорати инспекцияси Тошкент шаҳар ҳудудий бўлими инспектори Салимжон Нишонбоев ЎзАга маълум қилди.
“Агар йўловчи йўл ҳақини нақд кўринишда қабул қиладиган бўлса, ҳайдовчи қабул қилмаслиги керак. Вазият Транспорт инспекциясининг ҳудудий инспекторлари томонидан назорат қилинади. Биринчи сафар огоҳлантириш берилади. Огоҳлантиришга қарамасдан ҳуқуқбузарлик такрорланадиган бўлса, ўрнатилган тартибда ҳайдовчига ҳам йўловчига ҳам маъмурий баённома расмийлаштиришга тўғри келади”, дейди Салимжон Нишонбоев
Маъмурий баённома Маъмурий жавобгарлик тўғрисидаги кодекснинг 144-моддаси (транспортда чиптасиз юриш) ҳамда 145-моддасига (йўловчиларни чиптасиз ташиш) асосан расмийлаштирилади. Яъни, йўловчига нисбатан маъмурий баённома Маъмурий жавобгарлик тўғрисидаги кодекснинг 144-моддасига асосан тузилади ва БҲМнинг ўндан бири миқдорида — 37 минг 500 сўм жарима белгиланади. “Тошшаҳартрансхизмат” акциядорлик жамияти томонидан барча автобусларга назорат камералари ўрнатилган.
Тошкент шаҳар транспорт бош бошқармаси бошлиғи ўринбосари Аллаёр Норбўтаевнинг билдиришича, бугунги кунда пойтахтда 2644 та автобекат бўлса, улар атрофига 5500 та QR-чипталар олиш учун шохобчалар ўрнатилган. Айни дамда Тошкентда мавжуд бўлмаган бекатларга инфокиоскларни интеграция қилиш ишлари кетмоқда.
Ўзбекистонда автобусларда йўл ҳақи учун нақд пулдан воз кечиб, тўлиқ электрон тўлов тизимига ўтилиши ҳақида транспорт вазири Илҳом Маҳкамов октябрь ойида журналистлар билан суҳбатда маълум қилганди.
“Бекатларга нақд пулга билет ёки QR код сотиб олиш имконияти яратилади. Аксарият бекатларга инфокиосклар ўрнатилади. Ҳозир бу тажриба Тошкент шаҳрида синовдан ўтказиляпти. Барча автобусларга шу QR кодларни ўқий оладиган девайслар ўрнатилади. Улар ўрнатилгач, табиийки кондукторлар ишламайди. Сабаби нақд пулни йиғиш эҳтиёжи қолмайди”, деган эди вазир.
2025 йил 1 январдан пойтахт жамоат транспорти йўналишларида (автобус ва метрополитен) бир йўловчи қатнови учун чекланган тариф — 3 000 сўм этиб белгиланди. Бунда тўлов электрон тўлов тизими (транспорт ёки банк картаси) орқали амалга оширилганда ҳозиргидек ўзгаришсиз қолади — 1 700 сўм.
Нақд пул орқали автобусларда ҳаракатланиш учун Тошкент шаҳридаги бекатларда ва улар яқинида ўрнатилган барча тўлов қурилмалари яъни, Paynet, МultiPay ва Оson инфокиоскалари орқали бир марталик чипта харид қилиш керак бўлади.
Изоҳ (0)