Тошкентдан шаҳридан таътилга отланаётган талабалар учун қўшимча автобус йўналишлари ташкил этилиши мумкин. Бу ҳақда Олий таълим, фан ва инновациялар вазирлиги маълум қилди.
Вазирлик ахборот хизматининг хабар беришича, 19 декабрь куни Олий таълим, фан ва инновациялар вазири Қўнғиротбой Шарипов иштирокида йиғилиш ўтказилган. Унда талабаларнинг қишки таътил даврини мазмунли ташкил этиш, уларнинг таътилни ўз оилалари даврасида ўтказишлари учун зарур шарт-шароитлар яратиш масаласи муҳокама қилинган.
Маълум қилинишича, қишки таътил бошланиши муносабати билан Тошкент шаҳридан ҳудудларга жўнаб кетадиган 118 мингга яқин талабанинг ўз уйларига хавфсиз етиб бориши ва қайтиб келиши учун Транспорт вазирлиги ҳамкорлигида амалий чоралар кўрилмоқда.
“12 декабрдан бошлаб 50 фоиз чегирмага эга имтиёзли чипталар авиа ва темирйўл кассалари ҳамда автовокзалларда сотиш бошланган бўлиб, қўшимча равишда Ўзбекистон миллий, Тошкент давлат иқтисодиёт ва Тошкент давлат аграр университетларида сайёр кассалар ташкил этилди.
Бундан ташқари, 26 декабрга қадар эҳтиёжга кўра Транспорт вазирлиги билан ҳамкорликда қўшимча автобус ҳамда темир йўл поездлари қатновлари йўлга қўйилади”, дейилади хабарда.
Та`кидланишича, Тошкент шаҳридан ҳудудларга бир йўналишда жўнаб кетиш истагини билдирган талабалар сони 40 нафардан ошганда, Транспорт вазирлиги томонидан автобус ташкил этиб берилиши маълум қилинган.
Аввалроқ “Ўзтемирйўлйўловчи” АЖ кассалар ва иловада чипталар қолмагани ҳақидаги хабарларга муносабат билдирганди.
Маълумот учун, Олий таълим, фан ва инновациялар вазирлигининг тегишли буйруғи билан олий таълим ташкилотлари талабалари, техникум, коллеж, касб-ҳунар мактаби ва академик лицейлар ўқувчиларига 2024/25-ўқув йили учун бериладиган қишки таътил 2024 йилнинг 25 декабридан бошланади ва 2025 йилнинг 7 январига қадар (шу куни ҳам) давом этади.
Изоҳ (0)