Самарқанд вилояти ҳокими Эркинжон Турдимовнинг 6 сентябрдаги қарори билан Самарқанд шаҳри жамоат транспорти учун йўлкира нархи ўзгарди.
Унга кўра, автобус, электробус ва трамвай қатновлари учун йўлкира нақд ёки банк картасидан тўланганда 2000 сўм, АТТО транспорт картаси билан тўланганда эса 1600 сўм этиб белгиланди.
Транспорт карталаридан фойдаланган ҳолда бир соат ичида бир йўналишли йўловчи транспортидан бошқасига ўтиш сонидан келиб чиққан ҳолда имтиёзли тарифлар ҳам жорий этилди.
Хусусан, биринчи автобус учун тўлов 1600 сўм бўлса, иккинчи автобусга ўтганда 400 сўм тўланади. Учинчи ва кейинги автобусларда юриш бепул бўлади. Агар учинчи ўтилаётган транспорт трамвай бўлса, 1000 сўм тўланади.
Агар йўловчи биринчи трамвайга чиққан бўлса, 1600 сўм тўланади, ундан кейин автобусга ўтилганда 1000 сўм, иккинчи авотобусга ўтилганда 400 сўм тўланади. Учинчи ва ундан кейинги автобусларга ўтилганда пул тўланмайди.
Шунингдек, автобус ва электробусда юриш учун кунлик тарифлар (бир кунлик — 6000 сўм, 5 кунлик — 23 минг сўм, 7 кунлик — 30 минг, … 365 кунлик — 1 миллион 350 минг сўм) ҳам жорий этилди. Пенсионерлар, ногиронлар ва талабалар учун 50 фоиз чегирма берилади.
Автобус, электробус ва трамвайда юриш учун кунлик тариф — 7000 сўм, 5 кунлик — 32 минг, 7 кунлик — 40 минг… 365 кунлик — 1,9 миллион сўм этиб белгиланган.
Ҳужжатда қайд этилишича, Самарқанд шаҳри жамоат транспортида электрон тўлов тизими кенг жорий этилиши инобатга олинган ҳолда аҳолини етарли миқдорда транспорт карталари билан таъминлаш, шаҳар ҳудудида шундай карталарни сотиш шохобчаларини ташкил этиш чоралари кўрилади.
Изоҳ (0)