Тошкент метрополитенида 1 ноябрдан бошлаб жетондан фойдаланиш тўхтатилади, дея хабар бермоқда Транспорт вазирлиги.
Маълум қилинишича, Ўзбекистон Вазирлар Маҳкамасининг 2019 йил 25 ноябрдаги «Умумий фойдаланиладиган транспортда йўловчи ташишда йўлкира ҳақини тўлашнинг автоматлаштирилган тизимини жорий этиш тўғрисида»ги қарори ижроси юзасидан Тошкент шаҳар жамоат транспорти автобус ва метрополитен йўналишларида автоматлаштирилган тўлов тизимини жорий этиш ишлари доирасида 2020 йил 3 январдан эътиборан ягона транспорт карталари муомалага чиқарилган.
Вазирликнинг хабар беришича, ҳозирги кунда Тошкент метрополитенининг барча линияларидаги бекатлар йўл ҳақи тўловларини ягона транспорт карталари ва NFC банк карталари орқали амалга ошириш имкониятини берувчи стационар валидаторлар билан жиҳозланди.
Шу билан бирга Тошкентда йўловчиларга хизмат қилаётган «Тошшаҳартрансхизмат» АЖга қарашли 1000 дан ортиқ автобуснинг барчаси электрон карталар орқали тўловларни амалга ошириш имконини берувчи мобил ва стационар валидаторлар билан тўлиқ таъминланди.
Мавзуга доир: Тошкент метрополитенининг «Сергели» йўналишини қуриш ишлари якунланаётгани маълум қилинди
Ягона транспорт карталарининг ҳисобини метро кассалари, ойлик йўл чипталарини сотиш шохобчалари, инфокиосклар, барча электрон тўлов тизимлари орқали тўлдириш имконияти мавжуд.
«Ҳурматли йўловчилар, энди сиз шохобчалар ва кассаларга мурожаат этиб, ортиқча вақт сарфлашингизга ҳожат йўқ. Қолаверса, ўз саломатлигингизни асраш мақсадида ҳам йўл ҳақи тўловларини нақд пул кўринишида амалга оширишдан воз кечинг.
Йўл ҳақи тўловларини ягона транспорт карталари орқали амалга оширинг. Автоматлаштирилган тўлов тизими доирасида ушбу замонавий ва янги хизмат имкониятларидан фойдаланинг», – дейилади вазирлик хабарида.
«Тошшаҳартрансхизмат» матбуот хизматининг маълум қилишича, 1 ноябрь кунигача харид қилинган жетонлардан 2020 йил тугагунига қадар фойдаланиш мумкин.
Изоҳ (0)