Ҳафталик дайжест: Пули таланган «Жалолиддин», салқинда ойнани қорайтирамизми, кимлар даромадини декларациялайди?

Бу ҳафта халқимиз ҳаётига дахлдор янгиликларга бой бўлди. Дайжестимизни бошладик.

Ҳафта давомида тарқалган бир видео жамоатчиликнинг таъбини тирриқ қилди. Гап эри зўравонлик қилиб боласининг ахлатини едирган аёл ҳақида кетмоқда. Ушбу видео жамиятда аёлларнинг қадри, ўрни каби масалаларни яна муҳокама мавзусига айлантирди. Бу қадар жирканч ишга ўз аёлини мажбурлаб, яна видеога олдирган эркак номига кўплаб дарғазаб айбловлар янгради. Маълум бўлишича, бу оила Тошкент шаҳрининг Мирзо Улуғбек туманида яшайди. 46 ёшли эр аёлини муттасил калтаклаб, қийнаб келган. Аёлга етказилган тан жароҳатларининг оғирлигини аниқлаш учун суд-тиббий экспертизаси тайинланди. Ҳолат бўйича жиноят иши қўзғатилди. Зўравон эр қўлга олинди.

7 октябрь куни аёлга ҳимоя ордери берилди. Айни пайтда аёл ва унинг вояга етмаган болалари Оғир аҳволга тушиб қолган аёлларни реабилитация қилиш ва мослаштириш марказига вақтинча жойлаштирилди. Эркак уч йилгача қамалиши мумкин.

* * *

Катта шов-шувлар билан бошланган «Мендирман Жалолиддин» сериали лойиҳасининг ортидан ғавғо чиқди. Катта лойиҳанинг катта пули талон-торож қилингани айтилмоқда. Маълум қилинишича, Бош прокуратура томонидан «Ўзбеккино» Миллий агентлиги мансабдор шахсларига нисбатан Жиноят кодексининг 167-моддаси 3-қисми «а» банди (жуда кўп миқдорда ўзлаштириш ёки растрата йўли билан талон-торож қилиш) ва бошқа моддалари билан қўзғатилган жиноят иши бўйича дастлабки тергов ҳаракатлари олиб борилмоқда. Ушбу жиноят иши қўзғатилишига Молия вазирлигининг Давлат молиявий назорати департаменти мутахассислари томонидан «Ўзбеккино» Миллий агентлигида ўтказилган текширув ҳужжатлари асос бўлган.

Айтилишича, «Мендирман Жалолиддин» сериалига давлат маблағи сарфланмаган, уни Orient Финанс Банк молиялаштирган. Энг сўнгги хабарларга кўра, сериалга ажратилган 533 миллион сўм маблағ қайтарилган.

* * *

Кузнинг ўртаси яқинлашгани сари ҳаво салқинлашиб, ойнаси қорайтирилган машинага тобора эҳтиёж камайиб бораётган пайтда «тонировка» нархини арзонлаштириб қўйишди. М1 (енгил автомобиллар), Н1 ва Н2 тоифага оид юк машиналари орқа ён ойналарининг тусини ўзгартиришга (қорайтиришга) рухсатнома бериш учун тўлов ставкалари жисмоний шахслар учун базавий ҳисоблаш миқдорининг 5 баравари (1 115 000 сўм) этиб белгиланди. Бунга қадар ушбу миқдор БҲМнинг 10 баравари (2 230 000 сўм) эди. Қолаверса, фақат енгил автомобилларга ойнасининг тусини қорайтиришга рухсат этилган эди.

Юридик шахслар учун орқа ён ойнани қорайтириш учун тўлов миқдори ўзгармаган — БҲМнинг 10 баравари (2 230 000 сўм).

* * *

Ҳукуматни йиқитиш борасида беларусларга «мастер-класс» кўрсатаётган Қирғизистонда тобора тартибсизликлар авжга минмоқда. Қўшнинг тинч – сен тинч. Қирғизистондаги тўполонлар Ўзбекистонни ҳам хавотирга солмоқда. Ўзбекистон Ташқи ишлар вазирлиги 6 октябрь куни Қирғизистондаги воқеаларга муносабат билдирди. Баёнотда айтилишича, Ўзбекистон яқин қўшни ва стратегик шерик сифатида қардош Қирғизистондаги вазиятнинг мамлакат конституцияси ва миллий қонунчилиги нормаларига мувофиқ, тез орада барқарорлашувига умид қилади. 8 октябрь куни эса Туркманистон раҳбари билан Ўзбекистон раҳбари телефон орқали Қирғизистондаги вазиятни муҳокама қилди. Шундан кейин Ўзбекистон, Қозоғистон, Туркманистон ва Тожикистон республикалари президентлари Қирғизистондаги воқеалар юзасидан қўшма баёнот билан чиқди. «Қирғизистоннинг равнақи минтақавий хавфсизлик ва бутун Марказий Осиё барқарор ривожланишининг муҳим омилидир. Мамлакатларимизнинг ўтмиши бир, келажакни биргаликда барпо этади», деб таъкидланган баёнотда.

Сўнгги йиллар ичида Ўзбекистоннинг Қирғизистон билан алоқаси анча илиқлашди, чегара баҳсларининг бир қисми ечилди. Кунчиқардаги қўшнилар билан савдо алоқалари мавжуд. Ўзбекистон қишлоқ хўжалиги техникаси ва маиший техника, автомобиллар сотса, қирғиз томони озиқ-овқат, жумладан, сут, гўшт маҳсулотлари етказиб беради. Фарғона водийси аҳолиси Қирғизистондан учинчи давлатда ишлаб чиқарилган маҳсулотларни харид қилади, бундан ташқари, қўшни давлатда ўзбек меҳнат муҳожирлари бор.

* * *

Агар метро учун аввалдан бир чўнтак жетон харид қилиб қўйган бўлсангиз, тезда ишлатиб юборинг, чунки улар тез орада кераксиз бўлиб қолади. Тошкент шаҳар жамоат транспорти — автобус ва метрополитен йўналишларида автоматлаштирилган тўлов тизими жорий этилмоқда. 3 январдан махсус транспорт тўлов карталари сотувга чиқарилди. Тўлов карталарининг нархи 11 000 сўм. Ҳар бир картага олдиндан бир марталик тўлов миқдори юкланган. Карта орқали бир марталик йўл ҳақи 1 400 сўм. Карталар ҳисобини банк пластик карталаридаги маблағ ва нақд пул билан юқоридаги шохобчаларда тўлдириш имкони бор.

Тез орада карталар ҳисобини банкоматлар, киосклар, тўлдириш терминаллари ҳамда мобил иловалар орқали ҳам тўлдириш имконияти яратилади. Пенсионерлар, ўқувчи-талабалар ва қонунда белгиланган имтиёзга ҳақли фуқаролар учун чегирмалар сақланиб қолади.

* * *

7 октябрь тонгида Сирдарёнинг Гулистон шаҳридаги Алпомиш спорт мажмуасида ташкил этилган коронавирусга гумон қилинган ёки касалланган беморларга тиббий ёрдам кўрсатиш, саралаш ва тақсимлаш марказида кислород баллони портлади. Мутахассисларнинг айтишича, портлаш келиб чиқишига баллонлардаги кислородга мой қолдиқларининг аралашгани сабаб бўлган. Фавқулодда вазиятлар вазирлиги Гулистондаги портлаш оқибатида фуқароларга тан жароҳати етган, вафот этганлар йўқ, деб ахборот берди. Портлаш тўлқини бино девори ва ойналарини синдириб ташлаган. Портлаш юзасидан жиноий иш қўзғатилди.

Бу портлаш коронавирус беморларини даволаётган марказларни сергакликка чорлади. Хусусан, Наманган ҳокими коронавирус беморлари даволанаётган шифохоналарнинг хавфсизлик ҳолатини кўздан кечириб чиқди.

Қизиғи, Сирдарёдаги портлаш оқибатлари расми ижтимоий тармоқларда тарқалиб, коронабеморлар сони вилоят бераётган расмий статистикадан кўпроқлиги сезилиб қолди.

Умуман олганда, беморлар сонини камайтириб кўрсатиш биргина Сирдарёда деб бўлмайди. @davletovuz каналини ўқиб кўринг-а:

Шу йилнинг 5 октябрь кунидаги расмий статистикага кўра, Самарқанд вилоятида 143 нафар киши коронавирус асоратларидан даволанмоқда. Коррупцияга қарши курашиш агентлиги директори Акмал Бурҳоновга кўра, бугунги Самарқандда шифохоналарда 1 155 нафар бемор даволанмоқда. «Кимга керак 10 баравар қисқартириб? Балки коррупциямасдир. Сабабларини ўрганишимиз керак. Ҳамма вилоятларда шу аҳволлигини аниқ айта олишимиз мумкин», дейди у.

Андижон вилояти ҳокимлиги маълум қилишича, 7 октябрда вилоятда COVID-19 беморлари учун ҳозирги кунда жами 2 152 та махсус жиҳозланган, кислород билан таъминланган алоҳида захира жойлари мавжуд. Лекин Telegram-каналларда тарқаётган расмлар бунинг аксини кўрсатмоқда. Юрагинг ларзага келади. Ваҳоланки, Андижонда, 6 октябрь кунги расмий статистикага кўра, 100 нафар атрофида одам даволанмоқда, холос...

Коррупцияга қарши курашиш агентлиги директори Акмал Бурҳонов давлат бюджетидан ойлик пул оладиган барча давлат хизматчилари декларацияланиши лозимлиги ҳақида гапирди:

Бизнинг мақсадимиз давлат бюджетидан маош оладиган ҳамманинг мол-мулки декларацияланиши керак. Давлат раҳбаридан тортиб, ҳукумат раҳбари, судьялар, прокурорлар, ҳокимлар, вазирлик идоралари раҳбарлари, бошқарма ва бўлим бошлиқларининг ҳаммаси декларацияланади. Фақат бу босқичма-босқич, яъни энг юқоридан бошлаб пастга қараб кетилади. Босқичма-босқич амалга оширилаётганлигининг сабаби — тизим бўлиши кераклигида.

Акмал Бурҳонов

Сизга COVID-19 юққан ёки юқмаганидан қатъи назар, гигиена қоидаларига риоя қилинг. «Дарё»да қолинг, энг янги хабарларни бизда ўқинг.