Украина ва Россия кичик ҳажмли дронларга қарши курашиш билан боғлиқ қийинчиликларга дуч келаётган бир вақтда Британия армияси “радиотўлқин қуроли”ни синовдан ўтказди.
Британия Мудофаа вазирлиги хабарига кўра, мазкур қурол бир неча дронларни бирваракайига зарарсизлантира олади. Унинг номи Radio Frequency Directed Energy Weapon (RFDEW) бўлиб, юқори частотали тўлқинлар ёрдамида дронларнинг электрон қисмларини ишдан чиқариш орқали ишлайди.
Бу учувчисиз учиш воситасини парвозга яроқсиз қилиб, қулашига олиб келади. Маълум қилинишича, ҳар бир зарба учун атиги 10 фунт стерлинг (12,5 доллар) сарфланади. Тизим бир километр радиусдаги аскарлар ва ҳарбий иншоотларни ҳимоя қилиши мумкин.
Британия мудофаа вазирлиги Ғарбий Уэлсда ўтказилган синов муваффақиятли бўлганини, тизим бир неча дронларни муваффақиятли тарзда зарарсизлантирилганини тасдиқлади.
“RFDEW’нинг синовдан муваффақиятли ўтиши миллий қурол-яроғлар соҳасида туб озгариш ясаши мумкин бўлган навбатдаги муҳим қадамдир”, деди мудофаа харидлари ва саноати вазири Мария Игл.
RFDEW қуролли кучлар инвентарига олингандан сўнг, анъанавий ҳаво мудофаа тизимлари каби қиммат технологияларнинг ўрнини босиши мумкин. Боиси ҳозир амалда қўлланилаётган зенит-ракеталар нархи 80-100 минг АҚШ долларидан бошланади.
Дастур устида ишлаган жамоа янги қурол дронларнинг тобора кучайиб бораётган таҳдидларига қарши аниқ, самарали ва арзон ечим бўлиб, мамлакатнинг келажакдаги операцион имкониятларини сезиларли даражада яхшилаши мумкинлигини таъкидлади.
“Бу технологияни ҳарбийларимиз қўлига топшириш катта ютуқдир”, деди дастур раҳбари Метт Корк.
Британия армияси RFDEW билан қўшимча синовлар ўтказишни режалаштирмоқда. Янги тизим қироллик Украинадаги каби интенсив урушга ярим йил дош бера олиши ҳақидаги хабарлар тарқалганидан кўп ўтмай жамоатчиликка намойиш қилинди.
Изоҳ (0)