Самарқанд вилоятининг Пайариқ туманида милоддан аввалги II-И асрларга оид бўлган сак қабилаларига тегишли бронза қозон топилди. Бу ҳақда Маданий мерос агентлиги матбуот хизмати хабар берди.
Маълум қилинишича, ушбу қозон 1993 йилда Пайариқ тумани Муҳаммади қишлоғи фуқароси ўша вақтда мактабда директор бўлиб фаолият юритган Анвар Шоғдоров томонидан Қароқчи тоғи ва Тешиктепа археологик ёдгорлиги оралиғидаги адирдан канал қазиш вақтида топиб олинган. Фақат уни топиб олганлар унинг ноёблигини билмаган ва уй-рўзғор ишларида фойдаланиб келган.
Ноёб қозон Самарқанд давлат музей-қўриқхонаси илмий ходимлари музей тўпламларини бойитиш мақсадида вилоятлар бўйлаб экспедицияга чиққанда топилган. Қозон Еттисув воҳаси сак қабилаларига оид бўлиб, милоддан аввалги II-И асрларга оиддир. Унинг баландлиги 37 сантиметр, оғиз қисмининг диаметри 52 сантиметрни ташкил этади.
Қайд этилишича, ушбу ҳудудда бронза қозонларнинг аниқланиши биринчи марта эмас. Қароқчи тоғининг Қўшработ туманидан ўтган қисми ён бағрида жойлашган Сирлибойтепадан, Пайариқ туманидаги Кўктепа археологик ёдгорлигидан ҳам сакларга оид бронза қозонлар топилган.
Шунингдек, 2017 йилда Каттақўрғон туманининг Оқтов тоғларига туташ Йилқиҳайдар қишлоғидан ҳам маҳаллий аҳоли томонидан топилган сакларнинг бронза қозони музей-қўриқхонага топширилган.
Изоҳ (0)