Қозоғистон ҳаво ҳужумидан мудофаа кучлари “Сари-Шаган” полигонида учувчисиз учар аппаратларини йўқ қилиш бўйича машғулотлар ўтказди, деб хабар бермоқда Tengrinews. Бу республика кучларининг дронларни қидириш ва аниқлаш бўйича ўтаган илк машғулотлари бўлди.
Машқлар сценарийсига кўра, шартли душман томонидан ҳарбий ва фуқаролик инфратузилмаси объектларига отилган дрон ва қанотли ракеталар аниқлангач, зенит-ракета комплекслари олдиндан тайёрланмаган позицияларга сурилиб бориб, мўлжалланган нуқталарни нишонга олган ва йўқ қилган.
“Замонавий зенит-ракета комплекслари ёрдамида биз реал вақт режимидаги жанговар вазиятга тақлид қилдик. Шахсий таркиб эса бир нечта кичик ўлчамли паст учувчи ҳаво нишонларини аниқлаш, кузатиш ва йўқ қилиш бўйича машғулотларни ўтади”, — дея изоҳ берди республика ҳаво ҳужумидан мудофаа бригадаси командири Берик Молдақу.
Маълумот учун Украинадаги жанговар ҳаракатларда дронлардан фаол фойдаланилмоқда.
Изоҳ (0)