Қирғизистон президенти Садир Жапаров бюджетдан сотиб олинган Airbus H145 вертолётини синовдан ўтказди. Бу ҳақда президент матбуот хизмати хабар берди.
Маълум қилинишича, янги вертолёт Германияда республика бюджети ҳисобидан харид қилинган. Авиатехника аллақачон Қирғизистон Фавқулодда вазиятлар вазирлиги балансига ўтказилган.
«Президент Airbus H145 ни синовдан ўтказар экан, ҳозирги воқелик одамлар хавфсизлигини таъминлаш учун замонавий, кучли ускуналар ва воситаларга эга бўлиш заруриятини тақозо қилаётгани, бу эса одамларнинг хавфсизлигини таъминлашга ёрдам беришини айтди. Янги технологиялардан фойдаланиш оқибатларни бартараф этиш, шунингдек, фавқулодда вазиятларга жавоб бериш вақтини қисқартириш имконини беради», дейилади хабарда.
Таъкидланишича, янги вертолётдан қирғизистонликлар ҳам тижорат асосида фойдаланишлари мумкин. Маблағлар давлат бюджетига тушади. Airbus H145 8 та йўловчи ўриндиғига мўлжалланган бўлиб, энг янги навигация ускуналари, автопилот, ТАС 620 йўл ҳаракати ҳақида огоҳлантириш тизимлари, ҳавони қўшимча тозалаш ва бошқа инновациялар билан жиҳозланган.
Эслатиб ўтамиз, Қирғизистон мамлакат Қуролли кучлари учун Туркиядан бир қанча ҳужумчи дронлар, жумладан Aksungur ва Bayraktar сотиб олган. Туркиянинг Bayraktar ТB2 ҳужумчи дрони Қирғизистон Миллий хавфсизлик давлат қўмитаси (ГНКБ) чегара хизматига биринчи марта 2021 йил декабрь ойида олиб келинган.
31 март куни мамлакатнинг Иссиқкўл вилоятида дронлардан фойдаланган ҳолда ҳарбий машғулотлар ўтказилган. 13 сентябрь куни Қирғизистон президенти Садир Жапаров ГНКБ Чегара хизматининг дрон базасини очган. Қирғизистон КХШТга аъзо давлатлардан биринчи бўлиб турк Bayraktar’ларини сотиб олди.
Изоҳ (0)