Россиянинг ҳаво ҳужумига қарши мудофаа тизимлари 26 декабрга ўтар кечаси Саратов вилоятидаги Энгельс ҳарбий аэродромига яқинлашиб келаётган Украина дронини уриб туширди. Бу ҳақда Россия Мудофаа вазирлигига таяниб, «РИА Новости» хабар берди.
Вазирлик маълумотига кўра, дрон қисмларининг қулаши оқибатида уч нафар ҳарбий хизматчи оғир тан жароҳати олган, уч киши ҳалок бўлган. Аэродромдаги самолётларга зарар етмаган. Энгельсдаги портлаш ҳақидаги хабарлар дастлаб ижтимоий тармоқларда пайдо бўлди. Шаҳарда сирена садолари акс этган видеолар намойиш қилинди. Шунингдек, портлашнинг видеокузатув камерасидаги тасвири ҳам эълон қилинди.
Таъкидланишича, аэродромдаги портлашдан сўнг 120 квадрат метр майдонда ёнғин чиққан.
Саратов вилояти губернатори Роман Бусаргин Энгельс аҳолиси учун «ҳеч қандай» хавф йўқлиги, турар жойларда фавқулодда вазиятлар кузатилмаганини айтди.
«Фуқаролик инфратузилмаси объектлари зарар кўрмади. Ҳарбий объектдаги ҳодиса ҳақидаги маълумотлар ҳуқуқ-тартибот идоралари томонидан текширилмоқда», — дея қўшимча қилди у.
5-декбар куни Россия Мудофаа вазирлиги Украина Саратов ва Рязань вилоятларидаги ҳарбий аэродромларга дрон билан ҳужум қилишга урингани, оқибатда уч ҳарбий ҳалок бўлганини маълум қилганди. Бунга жавобан Россия Украина ҳарбий қўмондонлик ва назорат тизими ва тегишли мудофаа 17 та объектларига кучли зарба берган.
Россия оммавий ахборот воситаларида Украина Қуролли кучларига тегишли дронлар Қозоғистон ҳудудидан учирилгани ҳақида хабар тарқалган. Республика Мудофаа вазирлиги мазкур хабарни рад этган.
Изоҳ (0)