Қирғизистоннинг Air Мanas авиакомпанияси узоқ танаффусдан сўнг Бишкек—Тошкент—Бишкек йўналиши бўйича илк парвозни амалга оширди, деб хабар бермоқда Uzbekistan Airports матбуот хизмати.
Маълум қилинишича, 4 март куни маҳаллий вақт билан соат 10:05 да ушбу авиакомпания самолёти Тошкент аэропортига қўнди. Анъанага кўра, самолёт сув аркаси билан тантанали равишда кутиб олинди. Соат 11:15 да самолёт бортида 144 нафар йўловчи билан Тошкент —Бишкек йўналиши бўйича жўнаб кетди.
Март ойи давомида парвозлар душанба ва жума кунлари чартер асосида амалга оширилади. Ёзги жадвалга ўтиш муносабати билан Air Мanas авиакомпанияси Бишкек—Тошкент—Бишкек йўналиши бўйича мунтазам қатновларга ўтишга умид қилмоқда.
Маълумот учун, авиаташувчи Ўзбекистонга деярли икки йил давомида парвоз қилмаган — 2020 йилда пандемия сабабли парвозлар тўхтатилган эди.
Бундан аввал Россиянинг S7 Airlines компанияси Ўзбекистонга барча рейсларни май ойигача бекор қилгани ҳақида хабар берилган эди.
Изоҳ (0)