Озарбайжоннинг учта шаҳри — Ганжи, Тартера ва Горадизада Арманистон ҳужуми оқибатида 22 нафар тинч аҳоли вакили ҳалок бўлди, 74 киши жароҳатланди, деб хабар берди Озарбайжон Ташқи ишлар вазирлиги. Аввал Қорабоғ армияси Ганжидаги ҳарбий аэродром ҳаво ҳужумига учраганини маълум қилганди. Бокуда ҳарбий объект ҳаво зарбасини қабул қилиб олмагани, балки фуқаролик инфратузилмасига зарар етгани билдирилган. Ереван ушбу ҳужумларда иштироки борлигини инкор этмоқда. Бу ҳақда «Коммерсантъ» хабар қилди.
«Арманистоннинг ҳаводан фуқароларга, фуқаролик объектларига атайин йўллаган зарбалари халқаро ҳуқуқ, жумладан, халқаро инсон ҳуқуқлари нормаларининг қўпол равишда бузилганини англатади… Тинч аҳолига Арманистон қуролли кучлари томонидан бу каби ҳужумларнинг давом этиши ва айбсиз одамларнинг қурбон бўлиши Арманистоннинг тажовузкор сиёсат олиб бораётганидан дарак бермоқда»,— дейилади Озарбайжон ТИВ хабарида.
Шунингдек, 4 октябрь куни мустақиллиги тан олинмаган Тоғли Қорабоғ республикаси қўшини Озарбайжон ҳарбий ҳаво кучларининг 3 та самолётини уриб туширгани ва иккита танкини йўқ қилганини хабар қилган. Ушбу маълумотни Арманистон мудофаа вазирлигининг матбуот котиби Шушан Степанян расман тасдиқлаган. Боку эса ўзи томонидан йўқотишлар бўлгани ҳақидаги ушбу ахборотларни тасдиқламаган.
«Соат тахминан 12:00 да жанубий йўналишдаги Арцах қўшини рақибнинг учта самолётини уриб туширган ва иккита танкини йўқ қилган»,— деб ёзган Степанян Facebook’даги саҳифасида.
Тоғли Қорабоғ пойтахти– Степанакерт шаҳридаги отишмалар давом этмоқда. Снарядлардан бири шаҳардаги электрподстанциясига тушган. Daily Storm маълумоти бўйича, шаҳар ҳудудида электр таъминоти бутунлай ўчган. Арманистон Мудофаа вазирлиги Озарбайжон армиясининг Тоғли Қорабоғдаги муҳим инфратузилма объектларига ҳужум уюштираётганини тасдиқлаган.
Аввалроқ мустақиллиги тан олинмаган Тоғли Қорабоғ республикаси ҳукумати Озарбайжондаги ҳарбий объектларга уюштирилган ҳужумлар Степанакерт шаҳрига қилинган ҳаво зарбалари учун жавоб эканини билдирганди. Орадан бир неча соат ўтгач республика президенти Араик Арутянян Ганжи шаҳридаги ҳарбий объектларга ҳужумни тўхтатиш ҳақида буйруқ берган ва бу орқали тинч аҳолининг қурбон бўлишининг олдини олган.
Арманистон ва Озарбайжон ўртасидаги Тоғли Қорабоғ ҳудудида кузатилаётган тўқнашувлар 27 сентябрда бошланган. Иккала томон низонинг бошланишида бир-бирини айбламоқда. Қуролли ҳаракатларда икки томон ҳам авиация, артиллерия ва танклардан фойдаланмоқда ва бу тинч аҳоли орасида ҳам қурбонлар бўлишига олиб келмоқда. Тўқнашув 1994 йилдан бери кузатилмаган энг қонли воқеалардан бирига айланди. Иккала мамлакатда ҳам ҳарбий сафарбарлик эълон қилинган.
Изоҳ (0)