Дамашққа қуролли мухолифат гуруҳлар ҳужуми туфайли Сурия президенти лавозимини тарк этган Башар Асад фуқаролик уруши ва ундан кейинги воқеалар давомида ҳеч қачон истеъфога чиқиш ва бошпана сўраш масаласини кўриб чиқмаганини маълум қилди.
Унинг таъкидлашича, у пойтахтга қуролли гуруҳлар яқинлашган — 8 декабрь куни эрталабгача Дамашқда бўлган, ўша куни кечқурун Сурияни тарк этган. Бу унинг Сурияда ҳокимият алмашгандан кейинги биринчи оммавий баёнотидир.
Унга кўра, жангарилар Дамашққа кириб келганидан сўнг у Суриянинг Латакия вилоятига йўл олган, бу ерда Россиянинг Хмеймим авиабазаси жойлашган. Унинг пойтахтдан чиқиб кетиши “рус иттифоқчилари билан ҳамкорликда ҳамда келгусида жанг ҳаракатларини кузатиб бориш мақсадида” амалга оширилган. Кечқурун Асад Россияга учиб кетган.
Асаднинг айтишича, пойтахтни жангарилар эгаллаб олгани ҳақида у Дамашқдан чиқиб кетганидан сўнг хабар топган. Мухолифат қўлга киритган мамлакатда президентлик лавозимини сақлаб қолишни у бефойда деб ҳисоблаган.
Унинг таъкидлашича, жўнаб кетиши олдидан “сўнгги ҳарбий позицияларнинг вайрон бўлиши ва бунинг оқибатида барча давлат тузилмаларининг фалажланиши” юз берган.
“Суриядан чиқиб кетишим олдиндан режалаштирилмаган ва баъзилар айтганидек, жанглар кетаётган сўнгги соатларда содир бўлмаган”, дея қўшимча қилди у.
Суриядаги вазият
Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этди.
Россия Ташқи ишлар вазирлиги Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилган.
Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Кечроқ Кремлдаги манбалар Суриядан қочган президент оиласи билан Москвага келгани, Путин уларга бошпана берганини маълум қилди.
10 декабрь куни Идлиб шаҳрида қўзғолончиларга раҳбарлик қилган Муҳаммад ал-Башир ўзини Суриянинг ўтиш даври ҳукумати раҳбари этиб тайинлади. У фуқароларга қарата қилган телевидениэ мурожаатида бу лавозимни камида 2025 йил 1 мартгача эгаллаб туришини айтди.
Изоҳ (0)