Кремль матбуот котиби Дмитрий Песковнинг айтишича, Россия Украина билан музокараларга тайёр, бироқ ҳозирча Украина расмийларидан аниқ таклифлар йўқ.
Бир кун аввал Украина президенти девони маслаҳатчиси Михаил Подоляк Россия билан тинч музокаралар ўтказиш зарурлигини таъкидлаб, ҳарбий можарони фақат Украинанинг ҳудудий яхлитлиги ва субъективлиги шарти билан ҳал қилиш мумкинлигини таъкидлаганди.
“Буларнинг барчаси шунчаки фалсафа сўқиш. Биз бу ишда батафсил тушунтиришларни эшитмадик. Бу мавзу вақти-вақти билан айтилади, лекин ҳеч қандай аниқ таклиф йўқ”, дея муносабат билдирди Дмитрий Песков Украина президенти девони маслаҳатчисининг сўзларига. Шу билан бирга, Россия президенти матбуот котиби Москва музокаралар жараёнига очиқ қолишда давом этишини қўшимча қилди.
Аввалроқ Владимир Путин Россия ва Украина ўртасида 2022 йил март ойида юзма-юз музокаралар чоғида ишлаб чиқилган тинчлик шартлари “ўзгармаганини” айтганди. Президентнинг фикрича, Истанбул келишувлари 2022 йил май ойида тугатилган Россия-Украина музокараларини давом эттириш учун асос бўлиши мумкин. Истанбул келишувлари тўплами, хусусан, Украинанинг НАТОга аъзо бўлишдан ва ядровий қурол яратишдан бош тортишини ўз ичига олган.
Владимир Зеленскийнинг идораси Владимир Путин томонидан можарони ҳал қилиш учун таклиф қилинган шартларни рад этиб, Россия билан тинчлик шартномасини тузишни “иблис билан келишув” деб атади.
Изоҳ (0)