Фарғона вилоятида солиқ қарздорлиги юқори бўлган тадбиркорлар билан учрашиш ва ундирув чораларини кўриш мақсадида хатлов тадбирлари бошланди, дея хабар берди «Дарё» мухбири.
Қайд этилишича, мавжуд қарздорликни мол-мулк ҳисобидан қоплаш учун вилоят давлат солиқ бошқармаси томонидан мажбурий ижро бюроси вилоят бошқармаси билан ҳамкорликда махсус ишчи гуруҳ ташкил этилган.
Хатловнинг дастлабки кунида вилоятдаги 25 та субъектнинг 14 таси 769 миллион сўм миқдорида тўловни амалга оширган. Шунингдек, қарздорлиги катта бўлган 11 та тадбиркорлик субъектининг 8,1 миллиард сўмлик мол-мулклари хатловга олинган. Хусусан, Фарғона шаҳридаги «Тоза ҳудуд» ДУК 3,7 миллиард сўм миқдоридаги солиқ қарздорлигини ўз вақтида тўламаганлиги учун корхонага тегишли бўлган 3,2 миллиард сўм қийматидаги MAN русумли чиқинди ташиш автомашинаси хатловга олинди ҳамда вақтинча сақлаш жойига олиб кирилган.
Қўқон шаҳридаги «Мустаҳкам тараққиёт таъмир» МЧЖнинг солиқлардан бўлган 1,1 миллиард сўм қарзи эвазига шу қийматдаги Shacman русумли юк транспорт воситаси хатланган. Қўқон шаҳридаги яна бир корхона «Қўқон нефть-газ пармалаш ишлари» акциядорлик жамиятининг 4,2 миллиард сўм солиқ қарздорлиги ҳисобига жамиятнинг раҳбар ва бош ҳисобчиси хоналари муҳрланиб, Камаз ва Nexia русумли автомобиллари жарима майдонига жойлаштирилган.
Шунингдек, Бағдод туманидаги «Тезкор шинам қурилиш» масъулияти чекланган жамиятининг 160 миллион сўм қийматдаги янги қурилган хонадони хатловга олинган.
Изоҳ (0)