Рақобатни ривожлантириш ва истеъмолчилар ҳуқуқларини ҳимоя қилиш қўмитаси Қашқадарё вилоятида фуқароларнинг кўплаб эътирозлари асосида чиқинди билан боғлиқ муаммолар юзасидан ўрганиш ўтказди.
Вилоятнинг 15 та туман-шаҳридаги 821 та маҳаллада 3 миллион 482,3 минг аҳоли мавжуд. Санитар тозалаш корхоналари 762 та маҳаллаҳа (2 миллион 533 минг аҳоли) чиқиндиларни тўплаш ва олиб чиқиб кетиш хизматлари кўрсатиб келади. Яъни бу хизматлар вилоятнинг 92,8 фоиз маҳалласи ёки 72,7 фоиз аҳолисини қамраб олган.
Бироқ аҳоли тўлиқ хатловдан ўтказилмагани, чиқиндиларни тўплаш ва олиб чиқиб кетиш хизматлари бўйича шартномалар хонадонлар билан эмас, маҳалла фуқаролар йиғини билан тузилган. Чиқинди топширмайдиган ва ҳеч ким яшамайдиган хонадонларга ҳам хизмат ҳақлари ҳисобланиши ҳамда чиқиндиларни 10−15 кунгача бўлган муддатда кечиктириб олиб кетилаётгани эътирозлар кўпайганини кўрсатган.
Ўрганиш давомида 2024 йилнинг 1-чорагидаги қарздорлик суммалари, чиқинди ташиш хизматларининг кўрсатилмаганлик вақтлари учун ҳисобланиб келинаётган суммалар таҳлил қилинган.
Ўрганиш натижаларига кўра, кўрсатилмаган хизматлар қисми учун номуайян доирадаги 351 минг 153 та хонадонда яшовчи 1 миллион 452 минг 276 нафар истеъмолчига жами 15 миллиард 593 миллион сўм қарздорлик ҳисобланган. Натижада 10 миллиард 929 миллион сўмлик маблағ қарздорлик ҳисобидан чиқарилиб, истеъмолчилар фойдасига ҳал қилинган.
Қаттиқ маиший чиқиндиларни олиб чиқиб кетишнинг минимал даврийлиги чиқинди тўплаш шохобчаларидан — бир кунда бир маротаба ва якка тартибдаги турар жой секторидан “сигнал” усулида — уч кунда бир маротабани ташкил қилиши белгиланган.
Бир неча кун олдин Тошкент ва Сирдарёда икки тадбиркорга газ бўйича асоссиз ҳисобланган 15 млрд сўм қарздорлик бекор қилингани тўғрисида хабар берилганди.
Изоҳ (0)