Ўзбекистон Президенти Шавкат Мирзиёев 15 декабрь, сешанба куни «Тошкент шаҳрида маиший ва қурилиш чиқиндилари билан боғлиқ ишларни амалга оширишни такомиллаштириш чора-тадбирлари тўғрисида»ги қарорни имзолади. Бу ҳақда Telegram’даги «Ҳуқуқий ахборот» канали хабар берди.
Давлат экология қўмитаси бошқарма бошлиғи ўринбосари Жамшид Исчановнинг маълум қилишича, ҳужжатга кўра, 2021 йил 1 апрелга қадар Вазирлар Маҳкамасига қаттиқ маиший чиқиндиларни йиғиш ва олиб чиқиш кетиш харажатларини истеъмолчилар томонидан истеъмол қилинадиган электр энергияси тарифларига киритиш механизмларини амалга ошириш бўйича асосли таклифларни киритиш топширилган.
Таъкидланишича, ушбу қарор «дебитор қарздорликни камайтириш учун» йўналтирилган.
Мақсадли кўрсаткичларга мувофиқ 2020 йил 31 декабрга бориб Тошкентда маиший чиқиндиларни йиғиш ва олиб чиқиб кетиш борасида кўрсатилаётган хизматлар бўйича дебитор қарздорлик 38,7 миллиард сўмни ташкил этади. 2021 йил 1 июлга бориб қарздорликни 33,2 миллиард сўмга, 31 декабрга бориб 20 миллиард сўмга, 2022 йил 31 декабрга қадар эса 10 миллиард сўмга тушириш режалаштирилган.
Айни вақтда маиший чиқиндиларни олиб чиқиб кетиш тарифи киши бошига ойига 4,5 минг сўмни ташкил этади.
Аввалроқ маиший чиқиндилар билан боғлиқ ишларни амалга оширишда давлат-хусусий шерикчилигининг янги модели жорий этилаётгани тўғрисида хабар берилганди.
Изоҳ (0)