Бразилия президенти Луис Инасиу Лула да Сильвага мияга қон қуйилиши сабабли жарроҳлик амалиёти ўтказилди, ҳозирда унинг аҳволи яхши. Бу ҳақда Сирио-Либанес шифохонаси баёнотига таяниб, Globo хабар бермоқда.
Бразилия президенти 9 декабрь куни кечқурун бош оғриғидан шикоят қилгач, шифохонага ётқизилган. МРТ текшируви “19 октябрь куни юз берган бахтсиз ҳодиса оқибатида” мияга қон қуйилганини аниқлаган. Ўша пайтда Лула да Сильва йиқилиб, боши билан урилгани хабар қилинганди.
Шифокорлар президентга краниотомия — бош суягини очиш амалиётини ўтказган. Бу жарроҳлик гематомани олиб ташлаш мақсадида амалга оширилган. Шифохона маълумотига кўра, жарроҳлик амалиёти ҳеч қандай муаммосиз кечган.
Ҳозирги вақтда президентнинг аҳволи яхши, у реанимация бўлимида шифокорлар назорати остида, дейилади баёнотда.
Лула да Сильва 20 октябрь куни соғлиғи туфайли Қозонга БРИКС саммитига боришни бекор қилганди. У ўз қароргоҳида йиқилиб, боши билан урилган. Ўшанда президентни шифокорлар кўрикдан ўтказиб, шифохонага ётқизиш шарт эмас деган хулосага келганди.
Изоҳ (0)