Жаир Болсонаро Сан-Паулудаги митингга ўн минглаб тарафдорларини тўплаб, ҳозирги Бразилия ҳукумати уни сиёсий таъқиб қилаётганини айтди. Бу ҳақда Деустче Wелле хабар берди.
У 2022 йилги президентлик сайловларидан сўнг давлат тўнтаришини амалга оширишга уринишда ўзини айбдор деб ҳисобламайди.
“Тўнтариш нима? Кўчаларда танклар, қурол-яроғлар, фитна. Буларнинг ҳеч бири Бразилияда содир бўлмаган”, — деди сиёсатчи 25 февралда Сан-Паулуда ўн минглаб тарафдорлари билан суҳбатда.
Шу билан бирга, Болсонаро амалдаги давлат раҳбари Луиз Инасиу Лула да Сильва ҳукуматини сиёсий таъқибларда айблаган. Собиқ президент сўнгги бир неча кун ичида ижтимоий тармоқларда ўз тарафдорларини демократик қонун устуворлигини ҳимоя қилишга чақирган. AFPга кўра, айрим намойишчилар Сан-Паулуга келиш учун 700 километр йўл босган.
2023 йил октябрь ойида Бразилия Миллий Конгрессига парламент комиссияси Жаир Болсонарога давлат тўнтаришига уриниш, сиёсий зўравонлик ва жиноий фитна айбловларини илгари сурган. Собиқ давлат раҳбари устидан тергов беш ой давом этиб, якуний ҳисобот 1300 саҳифани ташкил этган эди. Болсонародан ташқари яна 60 киши, жумладан собиқ вазирлар ва ҳарбийлар тартибсизликларга алоқадорликда айбланган.
Изоҳ (0)