Braziliya prezidenti Luis Inasiu Lula da Silvaga miyaga qon quyilishi sababli jarrohlik amaliyoti o‘tkazildi, hozirda uning ahvoli yaxshi. Bu haqda Sirio-Libanes shifoxonasi bayonotiga tayanib, Globo xabar bermoqda.
Braziliya prezidenti 9-dekabr kuni kechqurun bosh og‘rig‘idan shikoyat qilgach, shifoxonaga yotqizilgan. MRT tekshiruvi “19-oktyabr kuni yuz bergan baxtsiz hodisa oqibatida” miyaga qon quyilganini aniqlagan. O‘sha paytda Lula da Silva yiqilib, boshi bilan urilgani xabar qilingandi.
Shifokorlar prezidentga kraniotomiya — bosh suyagini ochish amaliyotini o‘tkazgan. Bu jarrohlik gematomani olib tashlash maqsadida amalga oshirilgan. Shifoxona ma’lumotiga ko‘ra, jarrohlik amaliyoti hech qanday muammosiz kechgan.
Hozirgi vaqtda prezidentning ahvoli yaxshi, u reanimatsiya bo‘limida shifokorlar nazorati ostida, deyiladi bayonotda.
Lula da Silva 20-oktyabr kuni sog‘lig‘i tufayli Qozonga BRIKS sammitiga borishni bekor qilgandi. U o‘z qarorgohida yiqilib, boshi bilan urilgan. O‘shanda prezidentni shifokorlar ko‘rikdan o‘tkazib, shifoxonaga yotqizish shart emas degan xulosaga kelgandi.
Izoh (0)