Бразилия президенти Лула да Сильва россиялик ҳамкасби Владимир Путинни 2024 йилги G20 саммитига таклиф қилишини айтди. Шу билан бирга, Бразилия Путинни ҳибсга олишга ордер берган Халқаро жиноий суднинг (ХЖС) Рим статутини ратификация қилган давлатлардан бири саналади.
“Путин келадими йўқми, у таклиф қилинади. Унга қарши процесс кетмоқда, оқибатларини унинг ўзи баҳолаши керак”, — деди Лула да Сильва Correio Brasiliense газетасига. “Бу суд қарори. Республика президенти бу қарорларни муҳокама қилмайди: уларни бажаради ёки бажармайди. Путин Бразилиядаги G20 ва БРИКС саммитларига таклиф қилинади. Ва агар у иштирок этса, нима бўлиш-бўлмаслигини билади”.
ХЖС 17 март куни Владимир Путинни ҳибсга олишга ордер берган. Судга кўра, Россия президенти Украинадан “болаларни ноқонуний равишда депортация қилиш билан боғлиқ ҳарбий жиноятлар” учун жавобгар ҳисобланади. Рим статутига аъзо давлатлар ордерни бажариши шарт.
Август ойида БРИКС саммити Жанубий Африка Республикасида бўлиб ўтди (у ҳам Рим статутининг аъзоси). Владимир Путин тадбирда видеоалоқа орқали иштирок этди. Бу қарор Россия ва ЖАР ўртасида “ўзаро келишув” асосида қабул қилинган.
Изоҳ (0)