Самарқанд вилоятида имтиёзли нархларда тарқатилиши лозим бўлган 50 тонна кўмирни сотаётган омбор мудири ва қоровули ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, “Кўмиртаъминот” МЧЖнинг Самарқанд филиали “Мароқанд” кўмир омбори мудири Ж.П. сохта ҳужжатларни расмийлаштириб, эҳтиёжманд оилаларга имтиёзли нархларда тарқатилиши лозим бўлган 50 тонна кўмирни фуқаро А.А.га 37,5 млн сўмга сотишга келишган.
Шундан 13,2 тонна кўмирни омбор қоровули Х.Ж. ёрдамида етказиб берган. Келишилган пуллар ҳисобидан 28 млн сўмни олган вақтида эса ушланган.
Мазкур ҳолат юзасидан Жиноят кодексининг 25, 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Кўмир сотаётган шахслар
Аввалроқ Қашқадарё вилоятининг Қарши шаҳрида 388,8 млн сўмлик, жами 451,4 тонна имтиёзли кўмир қиммат нархларда сотиб юборилгани аниқланганди.
Изоҳ (0)