Сурхондарё вилоятининг Узун туманида 1 470 тонна кўмирни талон-торож қилиш ҳолати аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, фуқаро Ф.М. “Эркинлик” МФЙ ҳудудидаги нотурар бинода сақлаб келган тегишли ҳужжатлари бўлмаган ҳар бир қопи 20 кг бўлган жами 5 000 қоп кўмирни фуқаро А.А.га 100 млн сўмга сотишга келишган.
Сўнг ушбу пул ҳисобидан 5 минг долларни олган вақтида ашёвий далиллар билан ушланган.
Ўтказилган терговга қадар текширувда, “Кўмир таъминот” МЧЖнинг Узун тумани омбори мудири Э.Р. куз-қиш мавсумида туман аҳолиси ва тумандаги ижтимоий соҳа объектларини иситиш учун олиб келинган умумий баҳоси 447,2 млн сўм бўлган жами 1 470 тонна кўмирни қиммат нархларда бошқа шахсларга сотиб юборган.
Оқибатда давлат ва жамият манфаатларига жуда кўп миқдорда зарар етказган. Хусусан, 2023 йилнинг сентябрь ойида ўтказилган тадбир давомида ушланган Ф.М.га 180 тонна кўмирни 120 млн сўмга сотгани аниқланган.
Мазкур ҳолатлар юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Изоҳ (0)